Polıtsııa basshylary adam kóp jınalatyn jerlerde azamattardyń suraqtaryna jaýap beredi
NUR-SULTAN. QazAqparat - 17-18 mamyr kúnderi respýblıka aýmaǵynda «Jolda qabyldaý» aktsııasynyń kezekti kezeńi ótkiziledi, dep habarlaıdy QazAqparat QR ІІM baspasóz qyzmetine silteme jasap.
«Óńirlik Polıtsııa departamentteri, ákimshilik polıtsııa, jergilikti polıtsııa jáne kóshi-qon qyzmeti basshylary halyq kóp jınalatyn jerlerde (ortalyq alańdar, saýda-oıyn saýyq ortalyqtary, mamandandyrylǵan HQKO jáne HQKO aınalasynda) arnaıy «jedel» qabyldaý oryndarynda turǵyndardyń suraqtaryna jaýap beredi.
Aktsııa kezinde azamattar óz máselelerin sheshý úshin tikeleı, eshqandaı aldyn ala jazylýsyz polıtsııa basshylaryna júgine alady», delingen habarlamada.
Mınıstrliktiń málimetinshe, telefon arqyly «qaýyrt jeli» uıymdastyryldy. Osy baılanys jelisi boıynsha jol qaýipsizdigi jáne kóshi-qon qyzmetine qatysty máselelerge jaýap alýǵa bolady.
Shara ótkiziletin oryndy jáne «qaýyrt jeliniń» nómirlerin https://mvd.gov.kz/portal/page/portal/mvd/MVD/Reception_on_the_road ІІM portalynan jáne polıtsııa departamentteriniń saıttarynan, sondaı-aq +7 (7172) 437613 telefonynan bilýge bolady.
Eske sala ketsek, osyndaı aktsııa elimizde 5-6 sáýirde ótken bolatyn. Jolda 250 jedel qabyldaý beketi jumys istedi. Eki kún ishinde «Jolda qabyldaý» pýnktterine 18 myńnan astam ótinish kelip tústi.
«Mınıstrlik bastamasymen qolǵa alynǵan «Jolda qabyldaýdyń» azamattarǵa qajettiligi is júzinde kórindi. Bul aktsııa - turǵyndarmen baılanys jasaýdyń jańa modeline kóshýdiń bir baǵyty. Osyǵan baılanysty, mınıstr Erlan Turǵymbaevtyń tapsyrmasy boıynsha óńirlik ishki ister organdary azamattardy jedel qabyldaýdy aı saıyn júrgizedi», delingen habarlamada.
