Polıtsııa bankterge pın-kodsyz tólem jasaý fýnktsııasyn alyp tastaýdy usyndy

ASTANA. QazAqparat – Bıyl elordadaǵy Almaty aýdanynda jeke múlikti urlaý faktisi 4,6 paıyzǵa ósken. Bul týraly BAQ ókilderiniń qatysýymen ótken brıfıngte Almaty aýdandyq polıtsııa basqarmasy basshysynyń orynbasary Marat Ómirbaev aıtty, dep habarlaıdy QazAqparat tilshisi.

«Taldaý kórsetkendeı, qylmystardyń 33,3 paıyzy jeke múlikti urlaýǵa qatysty. Almaty aýdany boıynsha atalǵan qylmystar sanynyń 60-qa nemese 4,6 paıyzǵa óskeni baıqaldy. ıAǵnı, ótken jyldyń sáıkes kezeńinde jeke múlik boıynsha 1308 urlyq faktisi tirkelse, bıyl 1368 qylmys tirkeldi. Múlikti urlaý qylmystarynyń kóbin (64%) basqa óńirlerden kelgender jasaıdy», - dedi Marat Ómirbaev.

Onyń aıtýynsha, bıyl elordadaǵy iri saýda jelilerinde de urlyq faktileri jıi tirkelgen.

«Máselen, «Magným» saýda jelisi tarapynan 138 aryz tústi. Olar boıynsha 54 qylmystyq is qozǵaldy. Sonymen qosa, «Smoll» sýpermarketinde - 16, «Dıona» dúkeninde – 42, «Sport master» jelisinde 34 urlyq faktisi tirkeldi», - dep toqtaldy ol.

Budan ózge, 114 bank kartalary urlanǵan. Tıisinshe, qoldy bolǵan kartalar arqyly tranzaktsııalar men tólemder jasalǵan.

«Bul faktiler sotqa deıingi tergep-tekserýdiń biryńǵaı reestrine engizildi. Urlyqtyń bul túriniń aldyn alý úshin biz ekinshi deńgeıdegi bankterge PIN-kodty engizbesten tólem jasaý, ranzaktsııalar júrgizý fýnktsııasyn alyp tastaý týraly usynys daıyndadyq», - dep málim etti Marat Ómirbaev.