Polıtsııa balalardyń tóbelesi beınelengen vıdeo týraly málimet usyndy
NUR-SULTAN. QazAqparat – Almaty oblysynyń Polıtsııa departamenti qarshadaı balalardyń tóbelesip jatqany beınelengen vıdeo týraly aqparat usynyp, oqıǵanyń mán-jaıyn túsindirdi, dep habarlaıdy QazAqparat tilshisi.
Almaty oblysy Polıtsııa departamentiniń baspasóz qyzmeti taratqan aqparat boıynsha, 14 tamyz kúni saǵat 17.00 shamasynda Іle aýdanynyń polıtsııa bólimine Boraldaı kentindegi Vodnık yqshamaýdanynyń 34 jastaǵy turǵynynan qońyraý túsken.
Oqıǵa ornyna kelgen ýchaskelik polıtsııa ınspektorlary kóp qabatty úıdiń aýlasynda 8 jastaǵy eki bala tóbelesip, keıin oǵan biriniń 14 jastaǵy aǵasy aralasqanyn anyqtaǵan.
«Qazir Іle aýdandyq polıtsııa bólimi ıývenaldy polıtsııa tobynyń qyzmetkerleri osy is boıynsha materıal jınaýda. Jınalǵan materıal tárbıe sıpatyndaǵy sharalardy qabyldaý úshin aýdan ákimdigi janyndaǵy kámeletke tolmaǵandardyń isteri jónindegi komıssııaǵa jiberiledi», - dep jazady departamenttiń baspasóz qyzmeti.
Al ózinen jasy kishi balaǵa qol jumsady delingen 14 jastaǵy jetkinshektiń ata-anasy ákimshilik jaýapqa tartylatyn boldy.
«Tóbeleske qatysqan balalar bir aýlada turady. Balalar men olardyń ata-analary ózara tatýlasty, bir-birine narazylyqtary joq. Almaty oblysynyń Polıtsııa departamenti turǵyndardy jalǵan aqparat taratpaýǵa, jelide jıi taraıtyn osy saryndas arandatýlarǵa senbeýge shaqyrady», - delingen polıtsııa deprtamentiniń resmı málimetinde.
