Polıtsııa bala ólimine sebepker batýttardy paıdalanýǵa tyıym sala almaıdy - TJD
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker úrlemeli batýttardy paıdalanýǵa polıtsııa nelikten tyıym sala almaıtynyn túsindirdi, dep habarlaıdy QazAqparat tilshisi.
«Meniń tyıym salýǵa zańdy túrde quzyretim joq. Búgin Premer-Mınıstrge bul máseleni aıqyndaý týraly usynys daıyndadym. Qandaı buzýshylyqtardyń jıi oryn alatynyn, qandaıy az oryn alatynyn aıta almaımyn. Sebebi oǵan saraptama jasamaımyz», - dedi ol búgin Úkimet otyrysy aıasynda uıymdastyrylǵan brıfıngte.
Onyń aıtýynsha, qazirgi ýaqytta quqyq qorǵaý organdary protseske tek baqylaý júrgize alady.
Sonymen qatar ol Qaraǵandyda bala ólimine sebep bolǵan batýttyń qojaıyny buryn tótenshe jaǵdaılar salasynda jumys istegenin aıtty.
«Tekserý júrgizildi. Ony kún burynǵy datamen eshkim de jumystan shyǵaryp jibermegenine sendirgim keledi. Atalǵan qyzmetker shynymen de 2001-2019 jyldary aralyǵynda jumys istedi. Onyń ózi bul bıznespen aınalyspaǵan. Bul bıznespen áıeli aınalysqan. 2018 jyly ol jeke kásipkerlik rásimdep, osy bıznespen aınalysqany anyqtaldy. Kúıeýi, otbasy oǵan kómektesip turǵan. Polıtsııa áıelin tergegen kezde ol kúıeýiniń kómektesetindigin aıtqan», - dedi V.Bekker.
