Polıtsııa astana ákimdiginde bolǵan tóbeles týraly málimet berdi

NUR-SULTAN. QazAqparat – Polıtsııa Nur-Sultan qalasynyń ákimdiginde tóbeles shyǵarǵan áıelderdiń isin tirkeýge aldy, dep habarlaıdy QazAqparat tilshisi.

«Polıtsııaǵa 25 shilde kúni saǵat 11.12 kezinde Beıbitshilik kóshesinde ornalasqan ákimdik ǵımaratyna beıtanys áıelder kelip, qoǵamdyq tártipti buzǵany, kireberisti jaýyp, er adamdy sabaǵany týraly habarlama kelip tústi», - dep jazylǵan departament dereginde.

Oqıǵadan keıin eki jaq bir-biriniń ústinen polıtsııaǵa aryzdanǵany belgili boldy.

«Kıkiljińge qatysýshylardyń eki tarabynan bir-birine shara qoldaný kerektigi týraly aryz tústi. Bul fakti «Saryarqa» aýdandyq polıtsııa basqarmasynda tirkeldi. Sot-medıtsınalyq saraptama taǵaıyndaldy. Sonyń qorytyndysy boıynsha qoldanystaǵy zańnama aıasynda sharalar qabyldanady», - dep jazylǵan departamenttiń baspasóz qyzmeti usynǵan málimette.

Eske salsaq, Telegram-kanaldarda elorda ákimdiginiń ǵımaratynda «er adamnyń kópbalaly analardan taıaq jegeni» týraly vıdeo taraǵan bolatyn.