Polıtsııa Arman Qudaıbergenovtiń nege bostandyqta júrgenin túsindirdi - sot otyrysy
ALMATY. QazAqparat - Almatyda Denıs Tenniń ólimine qatysty is boıynsha basty sot talqylaýy jalǵasyp jatyr, dep habarlaıdy QazAqparat tilshisi sot zalynan.
Sot otyrysynda Denıs Tenniń ólimine kúdikti Arman Qudaıbergenovtyń osyǵan deıingi urlyq jasaǵan qylmysy boıynsha birneshe kýəgerdiń jaýaby tyńdaldy.
Aıta keterligi, buǵan deıin Arman Qudaıbergenovtiń QR QK 188-baby boıynsha urlyq jasaǵany úshin jaýapkershilikke tartylǵany týraly jazǵan bolatynbyz.
Atap aıtqanda, Arman Qudaıbergenov Denıs Tenniń óliminen buryn astana qalasynda urlyq jasap, ustalǵan. Osyǵan baılanysty aınasy urlanǵan kóliktiń ıesi, jəbirlenýshi Sapar Shəmshıevtiń túsindirmesi tyńdaldy.
Al sot barysynda polıtsııa qyzmetkeri Nurǵısa Saǵyndyqov Astana qalasynan onlaın rejımde túsinikteme berdi.
«2018 jyldyń 11 shildesinde qyzmet barysynda tańǵy saǵat 4-te Arman Qudaıbergenov qylmys jasaý kezinde ustaldy. Kúdiktini tintý barysynda onyń paketinen Lexus kóliginiń eki aınasy tabyldy. Sonymen qatar, qolyndaǵy borsetkadan kempiraýyz (ploskogýbtsy, shestıgrannnıkı) alty qyrly kilt tabyldy. Qaıdan aldyń degen suraqqa qoqys jəshiginiń qasynan taptym dep jaýap berdi. Sosyn biz ózimiz patrýl jasaıtyn aımaqtan aınasy urlanǵan kólikterdi izdestire bastadyq. Sosyn qaladaǵy Kúıshi Dına kóshesindegi Lexus 570 markali kóliginiń aınasy ekenin anyqtadyq, ıesin taptyq. Sosyn bul derek boıynsha barlyq isti rəsimdep, kúdikti Almaly aýdandyq ІІB jetkizildi»,- dedi polıtsııa starshınasy Nurǵısa Saǵyndyqov.
Al jəbirlenýshi Sapar Shəmshıevke polıtsııa bul istiń jedeldetilgen qarqynda qaralatynyn aıtyp, bir apta ishinde habarlasamyz dep ýəde bergen. Sapar Shámshıev ózine 400 myń teńge materıaldyq shyǵyn keltirdi dep aryzdanǵan. Osy ýaqytqa deıin ol shyǵyn ótelmegen.
«Men mundaı qylmyskerler bostandyqta bolmaýy kerek dep sanaımyn. Ondaı adamdardy qoǵamnan alshaqtatý kerek. Onyń bostandyqta júrgenin bir aptadan soń BAQ arqyly bildim. Shynymdy aıtsam, ol qalaı bostandyqta júr dep tańǵaldym»,- dedi Sapar Shəmshıev.
Jəbirlenýshi 400 myń teńge kólemindegi shyǵyndy qaıdan alǵanyn naqtylaı almady. Sýdıa Keńshilik Əbildınov Sapar Shəmshıevten moraldyq, materıaldyq shyǵyn kólemin qaıta qarap negizdeýdi tapsyrdy.
Budan bólek, sot aldynda sol kezde polıtsııa aǵa leıtenanty bolǵan, qazirgi jekemenshik kompanııanyń zańgeri Farıda Razbekova jaýap berdi.
«Arman Qudaıbergenov isi maǵan kólik aınasynyń urlyǵy boıynsha tústi. Ol óz kinəsin tolyq moıyndady. Odan suraq-jaýap alyndy. Oǵan qatysty məjbúrleý sharasy qabyldandy. Ony (Qudaıbergenovty) mindetti túrde polıtsııa qyzmetkeriniń qatysýymen kelýi talap etildi. Ol isti jedeldetilgen túrde qaraý týraly ótinish túsirdi», -dedi Farıza Razbekova.
Sot otyrysynda qorǵaýshy taraptan qylmysy dáleldengen azamattyń nege bostandyqta júrgenin suraldy.
Buǵan Farıza Razbekova: «Ol ózi mekenjaıyn kórsetti. Buryn isti bolǵanmen, ol jazasyn tolyq ótegen. Urlaǵan múlkin erikti túrde qaıtardy. Bul sheshimimdi bólim basshysy Sherıazdanovpen aýyzsha kelisim jasadym. Onyń ústine ol jeńil qylmys jasaǵan», - dep jaýap berdi.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq isqozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti. Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
25 jeltoqsanda Almaty qylmystyq ister boıynsha aýdanaralyq mamandandyrylǵan sotta belgili sportshynyń ólimi boıynsha aldyn ala sot tyńdalymy ótken bolatyn.
