Polıtsııa Almaty turǵynynyń urlanǵan kóligin tez arada taýyp berdi
ALMATY. QazAqparat - Almatyda polıtsııa urlanǵan kólikti ıesine qaıtaryp berdi. Bul týraly qalalyq polıtsııa departamentiniń baspasóz qyzmeti habarlady.
Tatıana Býdaeva Feısbýkte kóliginiń joǵalyp tabylǵany týraly jazba qaldyrǵan. Tańǵy 9:30-da úıinen shyqqan áıel kóligin qoıǵan ornynan tappaı qalǵan. 102 nómirine habarlasqanda 10 mınýt ishinde polıtsııa kelgen. Barlyq qyzmet ókilderi beınekamera jazbalaryn qarap, kórshilerden suraq-jaýap alyp shyqty.
Júrgizilgen jedel izdestirý jumystarynyń arqasynda kólik 10 mınýttaı qashyqtyqta turǵan jerinen tabyldy.
«Bizdiń bólimshege «Toıota Kamrı» kóligi urlanǵany týraly habarlama tústi. Kólik ıesiniń túsiniktemesi boıynsha jedel tergeý toby quryldy. Kúdikti qylmystyń izi sýymaı jatyp, bir táýlik ishinde ustaldy. Kólikti Almaty oblysynyń 32 jastaǵy týmasy aıdap ketken. Kólik ıesine kelesi kúni qaıtaryldy», - dedi Almaly aýdandyq polıtsııa basqarmasynyń bólim basshysy Tańat Nazanov.
Kólik ıesi Tatıana Býdaeva polıtsııa qyzmetkerleriniń jedel áreketi úshin alǵys bildirdi.
«Avtoturaqta kóligimniń ornyn sıpap qalǵanda qatty qapalandym. Men ony nesıege alǵanmyn. Sony áli tólep jatyrmyz. Polıtseıler shuǵyl áreket etip, bir táýlik ishinde mashınamdy taýyp berdi. Men osy polıtsııa qyzmetkerlerin qylmyskerdi izin sýytpaı ustaǵany úshin marapattaýdy usynamyn», - dedi Tatıana Býdaeva. 
