Polıtsııa Almaty oblysynda aıý shabýyldap mert etken adamǵa qatysty qosymsha aqparat jarııalady
TALDYQORǴAN. QazAqparat - Almaty oblysynda aıýdyń er adamǵa qalaı shabýyldaǵany jaıly polıtsııa qyzmeti baıandap berdi, dep habarlaıdy QazAqparat tilshisi.
«Kýágerlerdiń aıtýy boıynsha, marqum Lepsi aýylynyń týmasy, týystaryna demalýǵa kelgen. 28 mamyr kúni ol úsh tanysymen birge atpen Lepsi ózenine balyq aýlaýǵa barǵan. Janynda ıti bolǵan. 30 mamyr kúni úıge qaıtar tusta 6 shaqyrymdaı jol júrgen. Jolda ıt aıýdyń qonjyqtaryn baıqap ony qýalaǵan. Iti borsyqtyń izine tústi dep oılaǵan atty jolaýshy sońynan ergen. Qalyń butanyń ishine kirgen ıt bir mezette qatty ulyǵan. Er adam ıtine kómektespek bolyp qalyń aǵashtyń ishine engen. Biraz ýaqyt ótkende onyń janushyrǵan daýysy estilgen. Sol sátte butanyń arasynan aıý atyp shyǵyp qasha jónelgen. Odan attar úrkip, adamdar seskenip qalǵan. Buta arasynan tabylǵan Reseı azamaty aýyr jaraqattyń saldarynan kóz jumdy», - dedi Alakól aýdandyq polıtsııa bóliminiń bastyǵy Qýat Ospanov.
Polıtseıler kóktemde aıý qonjyǵyn qorǵaý úshin adamǵa shabýyl jasaýy múmkin ekenin jáne osyǵan baılanysty saq bolý qajettiligin eskertti.
«Aıý qonjyǵyn qorǵamaq bolǵanyna baılanysty, ol atylmaıdy», - dep tolyqtyrdy oblystyq polıtsııanyń baspasóz qyzmetinen.
Esterińizge sala keteıik, Almaty oblysynda 41 jastaǵy Reseı azamatyn aıý talap, mert bolǵan edi. Qaıǵyly oqıǵa 30 mamyrda saǵat 06.25-ter shamasynda Alakól aýdanynda taýda bolǵan. Atalǵan derek sotqa deıengi biryńǵaı tergeý tizilimine oqys oqıǵa retinde tirkeldi.
