Polıtsııa advokat Aıman Omarovanyń kóliginiń órtenýine qatysty tekserý júrgizip jatyr
ALMATY. QazAqparat – Almatyda tanymal advokat Aıman Omarovanyń kóligi órtenip ketti. Polıtsııa bul derekke qatysty tekserýdi bastady, dep habarlaıdy QazAqparat tilshisi.
Oqıǵa 18 mamyr kúni Medeý aýdanyndaǵy ál-Farabı kóshesi men Nazarbaev dańǵylynyń qıylysynda bolǵan.
Aıman Omarova Facebook paraqshasynda kóliktiń tejegishi isten shyqqanyn jazdy.
Qalalyq tótenshe jaǵdaı departamentiniń ókilderi oqıǵa ornyna 7 mınýtta jetken.
«Órt sóndirýshiler 22.00 kelgende «Lexus-350» kóligi órtenip jatqan. Tilsiz jaý 2 sharshy metrdi sharpyǵan. Órt 22:04-te aýyzdyqtalyp, 22:07 de tolyq sóndirildi. Órtten japa shekkender joq», - dep málim etti TJD baspasóz qyzmeti.
Qalalyq polıtsııa departamenti atalǵan derek boıynsha QR QK 202-babynyń 2-bólimimen qylmystyq is qozǵady.
«Qylmystyq is óndirisi Medeý aýdandyq polıtsııa basqarmasyna berildi. Órt boıynsha tehnıkalyq saraptama taǵaıyndaldy. Saraptama qorytyndysynan keıin órttiń neden shyqqany anyqtalady», - dedi polıtsııa.
