Polıtsııa 12 adamnan turatyn esirtki satýshylar tobynyń qylmystyq áreketin toqtatty

ASTANA. QazAqparat - ІІM esirtki qylmysyna qarsy is-qımyl departamenti Aqmola oblysynyń polıtsııa departamentimen jáne Qarjy monıtorıngi agenttigimen birlesip, prokýratýramen kelisilgen uzaq merzimdi ázirleý men jedel-tergeý is-sharalarynyń kesheni barysynda esirtki satýmen aınalysqan uıymdasqan toptyń áreketin toqtatty, – dep habarlaıdy Polisia.kz saıty.

Ótken demalys kúnderi arnaıy qurylǵan jedel-tergeý toptary arnaıy maqsattaǵy bólimshe jaýyngerleriniń kúshtik qoldaýymen Astana, Qaraǵandy jáne Kókshetaý qalalarynyń aýmaǵynda osy qylmystyq bızneske qatysýshylardy ustady. Jedel ýákilder Astana, Kókshetaý jáne Qaraǵandy qalalarynyń aýmaǵynda esirtkini jasyryp ketý arqyly taratýmen aınalysqan 12 adamdy anyqtady. Olar «Telegram» qosymshasynda jumys isteıtin úsh ınternet-dúken arqyly áreket etken. Olardyń qatarynda uıymdastyrýshy, operator, býhgalter, ınternet-esirtki dúkeniniń ákimshisi, sondaı-aq 7 esirtki jasyryp ketýshi («ólshep, oraýshylar», «qoımashylar», «kladmender») bar.

12 mekenjaı boıynsha júrgizilgen tintý nátıjesinde 3 keliden astam gashısh, sonymen qatar daıyn oramdar, esirtkini býyp-túıýge jáne qoldanýǵa arnalǵan túrli qurylǵylar, qylmystyq bızneske qatysty qujattamalyq rastamasy bar tehnıka men uıaly telefondar, sondaı-aq ınternet-dúkenderdiń qarajat qozǵalysy týraly jazbalar tárkilendi. Ustalǵan esirtki jasyrýshylardyń qatarynda Kókshetaý qalasynyń 17 jastaǵy turǵyny da bar. Sonymen qatar, jedel ýákilder esirtki jasyrýshylardyń biriniń anasyn, ıaǵnı toptyń qylmystyq bıznesine qatysy bar 42 jastaǵy áıeldi ustady.– Qazirgi tańda ýaqytsha ustaý ızolıatoryna qylmystyq toptyń 10 múshesi qamaýǵa alyndy. Eki adamǵa qatysty «kelý týraly mindetteme» protsessýaldyq májbúrleý sharasy qoldanyldy. QR QK-niń 297-baby 3-bóligi boıynsha sotqa deıingi is júrgizý bastaldy (Esirtki zattaryn ótkizý maqsatynda zańsyz daıyndaý, saqtaý, tasymaldaý nemese ótkizý). Adamdar tobynyń aldyn ala sóz baılasýymen birneshe ret, asa iri mólsherde, elektrondyq aqparattyq resýrstardy paıdalaný arqyly jasalǵan bul qylmystar úshin múlki tárkilenip, on jyldan on bes jylǵa deıingi merzimge bas bostandyǵynan aıyrý jazasy qarastyrylady. Tergeý sharalary jalǵasýda. Tıisti saraptamalar taǵaıyndaldy, – dedi QR ІІM Esirtki qylmysyna qarsy is-qımyl departamenti bastyǵynyń orynbasary Asqar Muhametqalıev.