Polıtseılermen bolǵan janjal: Qostanaı polıtsııa departamenti atyshýly vıdeoǵa qatysty túsinik berdi

QOSTANAI. QazAqparat – Qostanaı oblystyq polıtsııa departamenti Jitiqara qalasynda tártip saqshylarynyń mas kúıinde júrgen qala turǵynyn kúshtep ustap jatqan sáti túsirilgen vıdeoǵa qatysty túsinikteme berdi, dep habarlaıdy QazAqparat.

Messendjerlerde úsh er adam, eki áıel jáne bir balanyń qatysýymen bolǵan vıdeo taralyp jatyr. Onda úsh er adamnyń janjaldasyp turǵan sát túsirilgen. Vıdeodaǵy eki er adam – polıtsııa qyzmetkerleri úshinshi er adamdy kúshtep alyp ketpek bolǵany túsirilgen. Sol ýaqytta áıelderdiń biri buny taspaǵa túsirip jatsa, ekinshisi kúıeýin polıtseılerden arashalap almaq bolyp turǵan. Bul rette áńgime barysynda boqaýyz sózder aıtyldy. Tártipsizdiktiń barlyǵy kishkentaı balanyń kóz aldynda boldy.

Polıtsııanyń málimetinshe, qazirgi kezde polıtsııa qyzmketkerleriniń qoǵamdyq jerde mas kúıinde júrgen azamatty ustap jatqany túsirilgen vıdeony taratý faktisi boıynsha tekserý júrgizilip jatyr.

«Patrýldik polıtseılerdiń Jitiqara qalasynyń 39 jastaǵy azamatyn ustaý kezindegi áreketiniń zańdylyǵyna baǵa beriledi. Qazirgi kezde tártip buzýshyǵa qatysty qoǵamdyq jerde mas kúıinde júrip, boqaýyz sóz aıtqany úshin usaq buzaqylyq faktisi tirkelip, QR Ákimshilik quqyqbuzýshylyq týraly kodeksiniń 434-baby boıynsha ákimshilik hattama toltyryldy.

Jitiqara aýdany polıtsııa bóliminiń bastyǵy Bolat Imanov janjal qatysýshylarymen kezdeskenin atap ótti.

«Polıtsııa qyzmetkerlerine qatysty tártiptik óndiris bastaldy, sondaı-aq jetonnan túsirilgen vıdeo zertteledi», - dep túıindedi polıtsııa qyzmetinde.