Polıtseılerge oıynshyq tapanshamen ses kórsetpek bolǵan qaraǵandylyqtar ustaldy
QARAǴANDY. QazAqparat - Qaraǵandyda polıtseıler kólik mingen tórt er adamdy ustady, olardyń biri polıtseılerge oıynshyq tapansha shyǵaryp, ses kórsetpek bolǵan. Polıtsııa ustap jatqan buzaqylardyń vıdeosy áleýmettik jelige tarady, dep habarlaıdy QazAqparat.
Oblystyq ІІD málimetterine qaraǵanda, oqys oqıǵa ústimizdegi jyly 17 shilde kúni 19:00 shamasynda bolǵan. Memlekettik tirkeý belgisi joq «BMV» avtomashınasy Buqar jyraý dańǵylymen kele jatqan. Al kóliktegi jolaýshylardyń biri tapanshaǵa uqsas zat shyǵarǵan.
Jol-patrýldik polıtsııasy polki qyzmetkerleri jyldam shara qoldanyp, Qaraǵandy qalasynyń 23 jastaǵy turǵyny júrgizgen kólikti ustaǵan. Tekserý kezinde kýágerlerdiń kózinde mashına salonynan plastmassadan jasalǵan oıynshyq tapansha tabylǵan.
Osy derek boıynsha, QR Ákimshilik quqyq buzýshylyq týraly kodeksiniń 621-babynyń («Qujattary joq jáne basqarý quqyǵy joq adamnyń kólik quralyn basqarýy») 2-bóligi, 590-babynyń («Kólik quraldaryn paıdalaný qaǵıdalaryn buzý») 2-bóligi boıynsha ákimshilik hattama toltyryldy.
