Polıtseılerge ıtin aıtaqtaǵan turǵyn qylmystyq jazaǵa tartylatyn boldy
TALDYQORǴAN. QazAqparat - Almaty oblysyndaǵy Talǵar aýdanyna qarasty Keńdala aýylynyń turǵyny polıtsııa qyzmetkerlerine ıtin aıtaqtady. Endi ol bul áreketi úshin qylmystyq jazaǵa tartylýy múmkin, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, 40 jastaǵy aýyl turǵyny úıinde shý shyǵarǵan. Oqıǵa ornyna jetken tártip saqshylary ishimdik iship alǵan azamatty tynyshtandyrmaq bolǵan. Alaıda ol baılaýly turǵan «alabaı» tuqymdy ıtin bosatyp, polıtseılerge qaraı aıtaqtaǵan. Qaýipsizdik maqsatynda tártip saqshylary ıtke oq atyp, jaralaýǵa májbúr boldy.
"Osy sátte buzaqy polıtsııa qyzmetkerlerinen qashyp, jasyrynyp úlgerdi. Birneshe kúnnen keıin ıttiń ıesi tabylyp, polıtsııa bólimine jetkizildi. Qazirgi tańda sotqa deıingi tergeý jumystary bastalyp, kúdikti Talǵardyń ýaqytsha oqshaýlaý ızolıatoryna qamaýǵa alyndy", dep málimdedi atalǵan vedomstvo ókilderi.
Almaty oblystyq polıtsııa departamenti baspasóz qyzmetiniń málimetinshe, jyl basynan beri tártip saqshylaryna ıt aıtaqtaý faktisi ekinshi ret tirkelip otyr. Tekeli qalasynyń turǵyny da ıtin polıtseılerge jiberip, izin sýytpaq bolǵan. Buzaqy ustalyp, qylmystyq jazaǵa tartyldy.
