Polıtseılerge ıpotekamen baspana alý jeńildetilmek

ASTANA. QazAqparat - Qazaqstanda ishki ister organdaryn jańǵyrtý jónindegi jol kartasy ázirlendi. Bul týraly búgin «Quqyq qorǵaý organdary qyzmetiniń ashyqtyǵy» atty konferentsııa barysynda  QR ІІM janyndaǵy Qoǵamdyq keńes tóraǵasy Marat Qoǵamov aıtty, dep habarlaıdy QazAqparat tilshisi.

«Jol kartasynyń jobasy ázirlenip, barlyq memlekettik organmen kelisildi. Endi Úkimet  sáıkes qaýly qabyldap, Saǵyntaev myrza qol qoıýy qajet. Kóp ózgeris, 9 tarmaq bar. Bul tarmaqtardyń ózin polıtsııadaǵy revolıýtsııa desek te bolady», - dedi Marat Qoǵamov.

Onyń atap ótýinshe, jol kartasynda kóptegen ózgertýler qarastyrylǵan.

«Óte kóp ózgeris kútiledi. Bul jeke quram sanyn qysqartýǵa ǵana qatysty  emes. Ol: qyzmetkerlerdiń áleýmettik-quqyqtyq jaǵdaıyn jaqsartý, jalaqylaryn kóterý, saralanǵan jalaqy, polıtseılerdiń  ıpotekaǵa tez arada qol jetkizýi. Bul rette ıpotekany jergilikti bıýdjet tarapynan jartylaı dotatsııalaý, mınıstrlik, jalpy memleket tarapynan bastapqy jarnaǵa kómek kórsetý oryn alýy múmkin. Ózderińiz de bilesizder, qazir bankterdiń bastapqy jarnasy tym joǵary bolǵandyqtan kez kelgen azamat ıpotekalyq kredıtke qol jetkize almaıdy», - dedi Qoǵamdyq keńes tóraǵasy.