Polıtseılerge alataıaq qaıtarylmaıdy - QR ІІM
ASTANA. QazAqparat - Jol qıylystarynda qozǵalysty retteıtin polıtseılerge alataıaqtardy qaıtarý týraly usynys engizilgen joq. QR Іshki ister mınıstrligi «QazAqparat» agenttiginiń joldaǵan saýalyna osylaı jaýap berdi, dep habarlaıdy QazAqparat.
«Іshki ister organdarynyń jumysynda taıaqshany (jezl) qaıtarý boıynsha usynys engizilmegen jáne qarastyrylmaǵan. Osy oraıda retteýshiniń jolda kórinýin jaqsartý maqsatynda jaryq shaǵylystyratyn nysandy kúrtesheler men qolǵaptardyń jańa úlgileri ázirlendi. Jańa úlgilermen jol-patrýldik polıtsııasy qyzmetkerleri kezeń-kezeńmen jabdyqtalatyn bolady. Qazirgi ýaqytta jol-patrýldik polıtsııasy qyzmetkerleri úshin jaryq shaǵylystyratyn 5 myń qolǵap pen manjet satyp alyndy», - dep atap ótilgen QR ІІM Memlekettik til jáne aqparat departamentiniń málimetinde.
Esterińizge sala keteıik, 2017 jyldyń 1 qańtarynan bastap ishki ister organdarynyń qyzmetkerleri kólikterdi toqtatý úshin arnaıy taıaqsha qoldanbaı keledi. 2017 jylǵa deıin qoldanylyp kelgen polıtseılerdiń alataıaqtary jınaqtalyp, arnaıy saqtaý úshin qoımalarǵa jiberilgen.
Atap aıtqanda, bıyl kóktemde QR Parlamenti Senatyndaǵy parlamenttik tyńdaýda kóshe qıylysynda qozǵalysty retteıtin polıtseılerge alataıaqtardy qaıtaryp berý usynysy aıtylǵan edi. Ásirese, bul alataıaqtardyń túngi ýaqytta qajettigi sóz boldy.
