«Polıtseılerdiń azdyǵynan barymtashylar basynyp barady» - respýblıkalyq basylymdarǵa sholý
***
Májilistiń Áleýmettik-mádenı damý komıtetiniń tóraıymy Darıǵa Nazarbaevanyń jetekshiligimen azyq-túlik ónimderiniń baǵasyn retteý máselesi talqylandy. Óńirlerde bolǵan kezdesýlerde turǵyndar negizgi azyq-túlik ónimderi baǵasynyń únemi óse beretinine úlken alańdaýshylyq bildiredi. Azyq-túlik qaýipsizdigi, ónimderdiń sapasy men qoljetimdiligi el turǵyndarynyń densaýlyǵy men ál-aýqatynyń jaqsarýyna tikeleı áser etetini anyq. Ol másele der kezinde sheshimin tappasa, qoǵamda áleýmettik shıelenis týǵyzýy múmkin. Májilis depýtaty, Áleýmettik-mádenı damý komıtetiniń múshesi Ýálıhan Bıshimbaev óz sózinde azyq-túlik ónimderi baǵasynyń ósimi týraly, onyń ishinde nan-toqash ónimderi, et jáne sút ónimderi, jemis-jıdek pen kókónis salasyndaǵy jaǵdaıǵa taldaý jasady. Ol baǵa ósiminiń negizgi sebepteri retinde baǵany retteıtin memlekettik ınstıtýttardyń álsiz ekenin jáne qarjy naryǵynyń damymaı otyrǵandyǵyn, taýar kólemimen salystyrǵanda, tabystyń shekten tys ósýin, saýdada qolma-qol aqshasyz esep aıyrysý júıesiniń damymaı kele jatqanyn, sondaı-aq óndiris kóleminiń qysqarýyn, ımporttyń ulǵaıýyn jáne óndiristegi taǵam ónimderin negizsiz ustap turýdyń óse túsýin atady. Bul maqala «Egemen Qazaqstan» basylymynyń búgingi sanynda «Azyq-túlik ónimderiniń baǵasy ósýine qarjy rynogynyń damymaı otyrýy da sebepker» degen taqyryppen berildi.
Osy basylymda «Aýǵan soǵysy ardagerlerine - memlekettik nagradalar» atty materıal basyldy. Májilis depýtaty, respýblıkalyq «Ardagerler qaýymdastyǵy» qoǵamdyq birlestiginiń tóraǵasy, general-polkovnık Qaıyrbek Súleımenov Qazaqstan Respýblıkasy Prezıdenti Nursultan Nazarbaevtyń Jarlyǵymen marapattalǵan birqatar Aýǵan soǵysy ardagerlerine memlekettik nagradalar tapsyrdy. Áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etýde, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin Qazaqstan Táýelsizdiginiń 21 jyldyq mereıtoıyna oraı II dárejeli «Aıbyn» ordenimen Mańǵystaý oblystyq «Boevoe bratstvo» jaýynger-ınternatsıonalıster qoǵamdyq birlestiginiń tóraǵasy Nurken Qarajanov pen Aýǵan soǵysy ardagerleri uıymdarynyń «Qazaqstan ardagerleri» qaýymdastyǵy tóraǵasynyń birinshi orynbasary Qaırat Elýbaev, III dárejeli «Aıbyn» ordenimen Qyzylorda oblystyq Aýǵan soǵysy ardagerleri men múgedekteri keńesiniń tóraǵasy Sáken Mahambetov, «Qurmet» ordenimen Aqtóbe oblystyq Aýǵan soǵysy ardagerleri qoǵamdyq birlestiginiń tóraǵasy Aslan Balqasynov marapattaldy.
***
«Ury baıymaıdy» desek te, elimizde urlyqty kásip etkenderdiń tirligi azaımaı tur. Tipti órship bara jatyr desek te bolatyn sekildi. Almaty qalasy men oblysy aýmaǵynda jıi estiletin páter urylary men barymtashylardyń áreketi osyndaı oıǵa jeteleıdi. Máselen, qazir Almaty oblysynyń qaı jeri bolmasyn, urylardyń «qoltańbasy» qalmaǵan aýyldar sırek», -dep jazady «Alash aınasy» gazeti «Polıtseılerdiń azdyǵynan barymtashylar basynyp barady» atty maqalasynda.
Osy basylymda «Munaıdy urlaımyz, sýymyzdy urlaımyz» atty maqala jaryq kórdi. Jer qoınaýyndaǵy en baılyqty tıimsiz jáne qorshaǵan ortaǵa zııan keltire ıgerý memlekettiń ekonomıkalyq ta, ekologııalyq ta qaýipsizdigine orasan zor nuqsan keltireri anyq. Solaı bola tura Aqtóbe oblysynda jer qoınaýyndaǵy en baılyqty ıgerýshiler zańdy belsheden basýlaryn qoıar emes. Jyldyń jartyjyldyǵynda munaı óndirip, ony satýmen aınalysatyn kompanııalardyń jumysyn teksergen Aqtóbe oblysynyń prokýrorlary osylaı dep dabyl qaǵýda.
***
«Týý týraly kýálik - adamnyń eń alǵashqy qujaty. Sondyqtan osy kýálikte balanyń aty-jóni durys jazylýyna basty mán berý qajet. Bala dúnıege kelgende ol mindetti túrde tirkeýge alynady. Sol kezde ulty qazaq azamattardyń aty-jóni, tegi qalaı jazylatynyn ár adam bilýi tıis»,- dep jazady «Astana aqshamy» gazeti. Ulty qazaq adamdardyń esimi uzaq bolsa da ony bólek jazýǵa jol berilmeıdi. Qujattarǵa adam esimderiniń durys jazylýy máselesin kótergen maqala «Aty-jónińiz durys jazylyp júr me?» degen taqyryppen berildi.
