Polıtseılerdi balaǵattaǵan Astana turǵynyna 1 mln teńge kóleminde aıyppul salyndy
ASTANA. QazAqparat - Bılik ókiline kúsh kórsetken 38 jasar azamatsha QR QK-niń 380-babynyń 1-bólimi boıynsha aıypty dep tanyldy jáne atalǵan azamatshaǵa 500 (bes júz) aılyq eseptik kórsetkish kóleminde aıyppul salyndy, dep habarlaıdy QR ІІM Kóliktegi ІІD-inen.
Atalǵan fakt Qaraǵandy-Suryptaý stansasynyń ІІJB sotqa deıingi biryńǵaı tergeý reestrinde QR QK-niń 380-babynyń 1-bóligi boıynsha tirkeldi.
«9 qazan kúni Qaraǵandy-Suryptaý stansasyndaǵy ishki ister jelilik basqarmasyna Kóliktegi ishki ister departamentine qarasty jolaýshylar poıyzyna ilesip júrý batalonynyń qyzmetkerinen habarlama kelip túsken. Habarlamada «Qostanaı-Almaty» baǵytyndaǵy jolaýshylar poıyzy vagondarynyń birinde 38 jastaǵy jolaýshy azamatsha zańǵa baǵynbaı, qyzmettik mindetin oryndap júrgen polıtseılerdi balaǵattap, qarsylyq kórsetkeni týraly baıandalǵan. Ol Astana qalasynyń turǵyny bolyp shyqty», delingen habarlamada.
