Polıtseılerdi 500 metrge súıregen: Qyzylordalyq júrgizýshi qamaýǵa alyndy

QYZYLORDA. QazAqparat – Qyzylorda oblysynda kóligimen polıtsııa qyzmetkerlerin 500 metrge súıregen júrgizýshi qamaýǵa alyndy, dep habarlaıdy QazAqparat Polisia.kz-ke silteme jasap.

8 tamyz kúni Jańaqorǵan aýdandyq polıtsııa bóliminiń patrýldik qyzmetkerleri erejeni buzǵan kólik júrgizýshisin toqtatqan.

Polıtsııa qyzmetkerleri zań sheńberinde kólik júrgizýshisine avtokólikten túsip, qujattaryn kórsetýin suraǵan ýaqytta júrgizýshi olardyń zańdy talabyna baǵynbaı, oqıǵa ornynan «izin sýytpaq» bolǵan. Kólik júrgizýshisi dórekilik tanytyp, ózin óte agressıvti ustady. Qarsylyq kórsetkennen bólek, ol kóliginiń memlekettik nómirin sheship alyp, kólikti toqtatý maqsatynda árekettengen polıtsııa qyzmetkerlerin 500 metrge deıin súırep barǵan

, - delingen polıtsııa habarlamasynda.

Málim etilgendeı, polıtsııa qyzmetkerleri túrli dárejede jaraqattar aldy.

Atalǵan derek boıynsha QR Qylmystyq kodeksiniń 380-babynyń 4-bóligi 1-tarmaǵyna (Bılik ókiline qatysty qorqytý nemese kúsh kórsetý áreketteri) sáıkes sotqa deıingi tergep-tekserý áreketteri júrgizilip jatyr. Tıisti saraptamalar taǵaıyndaldy. Kólik júrgizýshisi Jańaqorǵan aýdandyq polıtsııa bóliminiń ýaqytsha ustaý ızolıatoryna qamaldy. Avtokólik aıyp alańyna qoıyldy. Atalǵan bap boıynsha kúdikti úsh jyldan jeti jylǵa deıingi merzimge bas bostandyǵynan aıyrý túrindegi jazaǵa tartylýy múmkin. Qazirgi ýaqytta polıtseılerge qarsylyq kórsetý, kúsh qoldaný derekteri boıynsha qylmystyq ister tatýlasý negizinde toqtatylmaıtynyn eskertemiz

, – dedi Qyzylorda oblysy Polıtsııa departamentiniń bastyǵy Mahsýdhan Ablazımov.

Aıta ketetin jaıt, jyl basynan Qyzylorda oblysynda polıtseılerge qarsylyq kórsetýdiń 6 deregi bolǵan. Árbir is boıynsha zań sheńberinde tıisti sheshim qabyldandy.