Polıtseıler jyl saıyn tártip buzǵan 100 myńǵa jýyq jasóspirimdi ustaıdy

ASTANA. QazAqparat – Jasóspirimder kóbine qandaı quqyq buzýshylyqtarǵa barady? Balasyn qadaǵalamaǵan qansha ata-ana jaýapqa tartyldy? Atalǵan suraqtarǵa Іshki ister mınıstrliginiń Ákimshilik polıtsııa komıtetiniń basqarma basshysy Áset Ospanov jaýap berdi, dep habarlaıdy QazAqparat tilshisi.

«Polıtseıler jyl saıyn túrli quqyq buzýshylyq jasaǵan 100 myńǵa jýyq jasóspirimdi ustaıdy. Olardyń deni túngi ýaqytta ata-anasynsyz qydyryp nemese oıyn-saýyq oryndarynda júredi. Osy oraıda jyl basynan beri 31 myńnan astam ata-ana ákimshilik jaýapqa tartyldy. Sondaı-aq, kámeletke tolmaǵandardyń túngi ýaqytta oıyn-saýyq oryndarynda bolýyna jol bergeni úshin 800-ge jýyq kásipker ákimshilik jaýapqa tartyldy», - dedi Áset Ospanov ortalyq kommýnıkatsııalar qyzmeti alańynda ótken baspasóz máslıhatynda.

Bıyl 2 myńǵa jýyq jasóspirim kámeletke tolmaǵandardy beıimdeý ortalyqtaryna jiberilgen.

«Bala tárbıeleý jáne onyń quqyǵyn qorǵaý jónindegi mindetterin oryndamaǵany úshin 3,5 myńnan astam ata-ana ákimshilik jaýapqa tartyldy. Osy oraıda balalar men jasóspirimderdiń bos ýaqytyn tıimdi uıymdastyrý mańyzǵa ıe. Mysaly, sporttyq sektsııalar men shyǵarmashylyq úıirlerge berý taǵy sol sııaqty», - deıdi ІІM ókili.