Polıtseıler júkti áıeldi patrýldik kólikte bosandyryp aldy

QONAEV. QazAqparat - Almaty oblysynyń polıtseıleri júkti áıeldi patrýldik kólikte bosandyryp aldy, dep habarlaıdy QazAqparat tilshisi.

«7 qyrkúıekke qaraǵan túni Qarasaı aýdandyq polıtsııa qyzmetkerleri júkti áıelge kómek kórsetti. Polıtsııa qyzmetkerleri tolǵaǵy qysqan áıeldi perzenthanaǵa barar jolda patrýldik kólikte bosandyryp aldy. Oqıǵa Almaty-Boraldaı-Jibek joly avtojolynyń 16 shaqyrymynda boldy. Er adam patrýldik polıtsııa qyzmetkerlerin toqtatyp, júkti áıelin aýrýhanaǵa jetkizýin ótingen. Jol boıynda áıeldi tolǵaq qatty qysyp, polıtsııa qyzmetkerleri ony bosandyryp alýǵa májbúr bolǵan»- delingen Almaty oblystyq polıtsııa departamenti baspasóz qyzmetiniń habarlamasynda.

Vedomstvonyń aqparatyna sáıkes, alǵashqy kómek kórsetilgen soń, ana men jańa týǵan sábı dereý aýrýhanaǵa jetkizildi.

Foto: polisia.kz