Polıtseıler jol apatynan japa shekken balalar úshin qan tapsyrdy
Qalalyq ІІD resmı ókili Saltanat Ázirbektiń aıtýynsha, quqyq qorǵaý organdarynyń qyzmetkerleri jylda qaıyrymdylyq sharasyna qatysady.
«Biz ózgelerge úlgi bolý úshin qan tapsyryp jatyrmyz. Bul qaıyrymdylyq sharasynyń arqasynda myńdaǵan turǵyndy aman alyp qalýǵa bolatyn bolsa, qan ótkizýde turǵan esh qıyndyq joq. Men bul áreketimdi maqtan tutamyn», - dedi S. Ázirbek.
Onyń aıtýynsha, jaz mezgilinde balalardyń jol apatynan jaraqattaný kórsetkishi arta túsedi.
2016 jyldyń 4 aıynda 320 jol-kólik oqıǵasy tirkelgen. Bulardyń barlyǵynda balalar japa shekken. Bıyldyń ózinde 4 aı ishinde 245 jaǵdaı tirkeldi.
Qalalyq qan ortalyǵynyń dırektory Jandos Nádirov qoǵamnyń nazaryn balalar jaraqaty máselesine aýdarý mańyzdy ekenin atap ótti.
«Birinshi kezekte qanǵa muqtaj adamdar ol kúrdeli onkologııalyq aýrýlarmen aýyratyn balalar, bosanǵannan keıingi áıelder, sondaı-aq jol-kólik oqıǵalarynan zardap shekkender. Donor óz qanyn bere otyryp, qıyn jaǵdaıda qalǵan adamdarǵa kómektese alady. Biraq, jaǵdaı óte aýyr bolǵanda ǵana áreket etip, elimizde qan donory kúniniń jarııalanǵanyn kútý kerek emes. Qandy kez-kelgen kúni tapsyrǵan tıimdi, strategııalyq qorlar túrli aýyr jaǵdaılarda qoldaný úshin daıyn bolýy qajet», - dedi ol.