Polıtseıler jeti atys qarýy men 250-den astam oq-dárini tárkiledi - ShQO
ÓSKEMEN. QazAqparat – Shyǵys Qazaqstan oblysynyń tártip saqshylary óńir turǵyndarynan atys qarýlary men oq-dárilerdi tárkiledi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, polıtseıler Glýbokoe, Altaı, Besqaraǵaı aýdandarynyń jáne Rıdder qalasynyń turǵyndarynan zańsyz saqtalǵan jeti qarýdy anyqtap, tárkiledi. Onyń ishinde 3 sholaq myltyq pen 250-den astam oq-dári bar.
«Rıdderdegi 63 jastaǵy er adamnyń garajynan 28-kalıbrli, eki uńǵyly pnevmatıkalyq myltyq tabyldy. Saraptama nátıjesi kórsetkendeı, qarý atýǵa jaramdy», - dep habarlady vedomstvo ókilderi.
Departament bastyǵynyń orynbasary, polıtsııa polkovnıgi Talǵat Shaıahmetovtiń aıtýynsha, zańsyz aınalymdaǵy qarýmen bolashaqta qylmys jasalýy da ábden múmkin edi. Qazirgi ýaqytta polıtsııa qyzmetkerleri atalǵan faktiler boıynsha sotqa deıingi tergeý amaldaryn júrgizýde.
