Polıtseıler jalǵa beriletin páterler men bazarlardy tekserýdi jalǵastyrady
«Qyrkúıek aıynan bastap júrgizilip kele jatqan «Ýchaske» jedel aldyn alý is-sharasy jalǵasýda. Onyń basty mindeti - qyzmet kórsetiletin ýchaskelerde máselelerdi zerdeleý, quqyq buzýshylyqtyń aldyn alý jáne eskertý. Ýchaskelik polıtsııa ınspektorlary turǵyndarmen tanysyp, tártip buzýshylardy anyqtaý jáne polıtsııa esebinde turǵandardy tekserý, sondaı-aq problemalardy sheshý úshin aýlalardy jáne páterlerdi aralap halyqpen kezdesýler ótkizedi. Jalǵa beriletin páterler, bazarlar, turmysy nashar otbasylar, azamattyq qarý ıeleri men sheteldikter tekseriledi», - dedi Shuǵyla Turlybek Іshki ister mınıstrligi uıymdastyrǵan aptalyq brıfıngide.
Onyń aıtýynsha, polıtsııa belgili bir turǵylyqty jeri joq adamdardy, zańsyz kelgen sheteldikterdi, tyıym salynǵan zattardy saqtaý faktilerin anyqtaý maqsatynda saıajaılardy, qystaqtardy, shaǵyn eldi mekenderdi aralaıdy.
«Búgingi tańda polıtseıler 4 mıllıonǵa jýyq páter men jeke úılerdi aralap, 240 myńnan astam saıajaıdy jáne 52 myńǵa jýyq sharýa qojalyǵy men qystaqtardy tekserip shyqty. 72 myńnan astam jalǵa alynǵan páterge tekserý júrgizdi. Nátıjesinde, memlekettik kiris organdarynda tirkeýsiz turǵyn úıdi jalǵa berýdiń 9 myńǵa jýyq faktisi anyqtaldy. Atys qarýyn saqtaý jáne alyp júrý erejelerin buzýdyń 2,5 myńǵa jýyq jaǵdaıy tirkeldi. Zańsyz aınalymnan tirkelmegen atys qarýynyń 277-si alyndy», - dedi ol.
Operatsııa bastalǵannan beri polıtsııa qyzmetkerleri 388 myńnan astam ákimshilik quqyq buzýshylyqtyń, onyń ishinde 6 myń usaq buzaqylyq faktisiniń, turmysta 8 myńnan astam zań buzýshylyqtyń, 64 myńnan astam kóshi-qon zańnamasyn buzý jaǵdaıynyń jolyn kesti.