Polıtseıler zańsyz saqtalǵan 100-den astam qarýdy tárkiledi

NUR-SULTAN. QazAqparat – Qazaqstanda zańsyz saqtalǵan 109 ıir oıyqty, tegis uńǵyly, travmatıkalyq nemese gazdy qarý tárkilendi. Bul týraly QR Іshki ister mınıstrliginiń resmı ókili Nurdildá Oraz aıtty, dep habarlaıdy QazAqparat tilshisi.

Resmı ókil jeti kúndik «Quqyqtyq tártip» jedel aldyn alý is-sharasy aıasynda tyıym salynǵan zattar men qarý-jaraqty anyqtaý boıynsha jedel izdestirý is-sharasy ótkizilgenin jetkizdi.

«Osynyń nátıjesinde, zańsyz saqtalǵan 109 ıir oıyqty, tegis uńǵyly, travmatıkalyq nemese gazdy qarý tárkilendi. Esirtkini saqtaýdyń 209 faktisi anyqtaldy», - dedi N. Oraz aptalyq onlaın brıfıngide.

Onyń aıtýynsha, profılaktıkalyq is-shara kezinde 89 myńǵa tarta ákimshilik quqyqbuzýshylyqtyń joly kesildi. Onyń ishinde 9 myń usaq buzaqylyq, 13,5 myń spırtti ishimdikterdi ishý nemese qoǵamdyq oryndarǵa masań kúıde kelý faktisi anyqtaldy.