Polıtseıler urlanǵan jylqylardy ıesine qaıtardy - Qostanaı oblysy
QOSTANAI. QazAqparat - Qostanaı oblysynyń Naýyrzym aýdandyq polıtsııa bóliminiń qyzmetkerleri jergilikti sharýanyń urlanǵan jylqylaryn taýyp berdi, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Naýyrzym aýdandyq polıtsııa bólimshesine Qaramendi aýylynyń 68 jastaǵy turǵyny aryzdanǵan.
Onyń aıtýynsha, 6 jylqysy únemi aýyldan 25 shaqyrym jerdegi jaıylymda júretin. Ústimizdegi jyldyń 3 jeltoqsanynda ol jylqylarynyń joǵalǵanyn bilip, óz betinshe izdestire bastaıdy. Biraq, ol isi nátıje bergen joq.
«Oqıǵa bolǵan jerdi tekserý barysynda polıtsııa qyzmetkerleri tirkemesi bar avtokólik pen mal izderin anyqtady. Budan ári jedel-izdestirý is-sharalaryn júrgizý kezinde polıtsııa qyzmetkerleri janýarlardy tasymaldaý úshin paıdalanylǵan tirkemeniń ıesin anyqtady. Tirkeme ıesimen áńgimelesý arqyly polıtseıler kúdiktilerdi tapty. Olar urlyq faktisi jasalǵanǵa deıin jergilikti turǵynnyń tirkemesin ala turǵan. Urylar 35 jáne 49 jastaǵy jergilikti turǵyndar bolyp shyqty. Er adamdar buryn qylmystyq jaýapqa tartylmaǵan», - delingen polıtsııa departamentiniń baspasóz habarlamasynda.
Keltirilgen shyǵynnyń jalpy somasy 900 myń teńgeni qurady. Qazirgi ýaqytta osy fakti boıynsha QR QK 188-babymen sotqa deıingi tergeý júrgizilýde. Jylqylar ıesine qaıtaryldy.
