Polıtseıler suńqardy zańsyz alyp júrgen almatylyq júrgizýshini ustady
TALDYQORǴAN. QazAqparat - Almaty oblysyndaǵy Talǵar aýdanynyń polıtseıleri suńqar tektes jyrtqysh qusty zańsyz alyp júrgen almatylyq júrgizýshini ustady, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, QR Qylmystyq kodeksiniń 339-babyna sáıkes qylmystyq is qozǵaldy qus tárkilenip, Almaty qalasynyń haıýanattar baǵyna tabystalǵan.
«Almaty oblysy aýmaǵynda júrgizilgen «Brakoner» jedel aldyn alý is-sharasy barysynda Talǵar aýdanynyń tártip saqshylary arnaıy reıd júrgizip, Almaty qalasynyń 23 jastaǵy turǵyny kóliginde óte sırek kezdesetin jyrtqysh qusty eshqandaı ruqsatsyz ákele jatqanyn anyqtaǵan.
Tuqymy joǵalý qaýpi tóngen qustyń suńqar ekeni dáleldenip, ol birden haıýanattar baǵyndaǵy tıisti mamandardyń qolyna tapsyryldy. Sotqa deıingi tergeý amaldary kezinde kúdiktiniń aıtqan dáıekteri tekseriletin bolady. Kúdikti mekenjaıyn ózgertpeý týraly mindettememen bosatyldy«,- dedi Almaty oblysy PD Jergilikti polıtsııa qyzmeti basqarmasynyń aǵa ınspektory Erlan Qojaqov.
Tergeý barysynda kúdikti aıtqan dáıekter boıynsha ol Almaty mańyndaǵy týystarynyń úıine qonaqqa barǵan. Sol kezde aýla mańynan usha almaıtyn qusty kórip, jyrtqysh ekenin túsingen. Jaraly qusty sol úıdiń qorasyna qamap, ǵalamtordan qarap, emdeýge tyrysqan. Kelesi kúni qaıta oralyp, eldimekennen ushyryp jibergisi kelgende tártip saqshylary ustap alǵan.
Qazir tergeý jalǵasýda. Tártip saqshylary kúdiktiniń qusty qaıdan alǵanyn jáne ony qaıda apara jatqanyn anyqtaıtyn bolady.
