Polıtseıler sýıtsıd jasamaq bolǵan júkti áıeldi qutqaryp qaldy
ALMATY. QazAqparat - Almatynyń patrýldik polıtsııa qyzmetkerleri júkti áıeldi sýıtsıdten aman alyp qaldy. Bul týraly QazAqparat polisia.kz saıtyna silteme jasap habarlaıdy.
«Dýlatı kóshesiniń boıyn patrýldeý kezinde, qaraýsyz qalǵan jerden «Hıýndaı» markaly kólik tabyldy. Kólikte bir qyz jylap otyr eken. Kólikti tekserý kezinde hat pen arqan tabyldy. Boıjetkennen jaýap alǵan soń, onyń búgin eki ret óz-ózine qol jumsamaq bolǵandyǵyn anyqtadyq. Qyzdy patrýldik kólikke deıin shyǵaryp salyp, «jedel járdem» shaqyrdyq», – deıdi, Almaty qalalyq PD patrýldik polıtsııa polkiniń aǵa ınspektory, Dáýlet Turmanov.
«Meni polıtsııa qyzmetkerleri qutqardy. Úlken rahmet. Osy ýaqyt boıy olar meniń qaýipsizdigim úshin meniń qasymnan shyqpady. Qazir men munyń bárin túsindim...», - dedi jas áıel.
Mundaı is-árekettiń sebebi moraldyq jáne etıkalyq turǵydan aıtylmaıdy.
