Polıtseıler Shanxaı bazaryn tekserip jatyr
ASTANA. QazAqparat - Astanalyq polıtseıler «Shanxaı» bazaryndaǵy qurylys materıaldaryn satatyn oryndardy tekserýdi bastady. Negizgi maqsat - urlanǵan zattardy anyqtaý, dep habarlaıdy QazAqparat tilshisi.
Astana qalalyq ІІD taratqan aqparatqa sáıkes, tekseris sharalary arnaıy reıd aıasynda atqarylyp jatyr. Sebebi dál sondaı jerlerde urlanǵan zattar kóp satylady. Sonyń bárin qurylys nysandarynan, garajdardan jáne taǵy basqa jerlerden tasıdy. Tekseris kezinde qudyqtyń qaqpaqtary, kabelder, qoldanylǵan qurylys qural-saımandary, temir qaqpalar, radıatorlar anyqtaldy. Alypsatar jigitter ol zattardyń qaıdan jáne qalaı kelgenin túsindire almady.
Polıtseılerdiń aıtýynsha, quqyq qorǵaýshylardy kórgen boıda qashqan satýshylar da boldy. Biraq olardy birden qolǵa túsirdi. Ustalǵan azamattardyń ishinde kóshi-qon zańnamasyn buzǵandar da bar.
Aıta keteıik, buǵan deıin tártip saqshylary eki avtobazarda reıd ótkizgen bolatyn. Sol kezde 150 adam tekserildi. Olardyń ishinde ekeýi izdeýde bolǵan eken. Taǵy bireýi iz-túzsiz joǵalǵan bolatyn.
