Polıtseıler pırotehnıkalyq zattardy jeli arqyly satatyndardy baqylamaq
ASTANA. QazAqparat - Astanalyq polıtseıler úsh apta boıy qalada pırotehnıkalyq zattardy ruqsatsyz satatyndardy anyqtap, zańsyz saýdamen aınalysqany úshin ákimshilik is qozǵaıdy, dep habarlaıdy elorda ákimdiginiń medıa ortalyǵy .
«Elordada aǵymdaǵy jyldyń 19 jeltoqsanynan bastap Astanada «Pırotehnıka-2017» jedel aldyn-alý sharasy bastaldy. Úsh apta boıy tártip saqshylary zańsyz jáne sertıfıkattalmaǵan pırotehnıkalyq zattardy satýdyń aldyn alady», - dedi Astana qalalyq ІІD azamattyq jáne qyzmettik qarý aınalymyna baqylaý jasaý bólimshesiniń bastyǵy Baǵlan Qazbekov.
ІІD ókiliniń málimetinshe, aktsııa bastalǵaly beri pırotehnıka ónimderin zańsyz saýdalaýdyń bir oqıǵasy anyqtaldy.
«Odan 833 dana otshashý tárkilendi. Qazirgi ýaqytta ákimshilik quqyq buzýshylyq kodeksiniń 483-babyna sáıkes ákimshilik is qozǵalyp, jınalǵan qujattar sotqa jiberý satysynda», - dedi ol.
Astanada pırotehnıkalyq zattardy satýmen 5 kompanııa aınalysady. Olardyń lıtsenzııalyq ruqsaty men birneshe saýda núkteleri bar. Tártip saqshylary bazarlar men saýda ortalyqtary jáne basqa da halyq kóp júretin jerlerde zańsyz saýdamen aınalysatyndardy anyqtaýda. Buǵan qosa, polıtseıler pırotehnıkalyq zattardy áleýmettik jeliler arqyly satýmen aınalysatyn saýdagerlerdi de baqylaýda ustap otyr.
