Polıtseıler Petropavl turǵyndarynyń suraqtaryna onlaında jaýap berdi
PETROPAVL. QazAqparat – Soltústik Qazaqstan oblysynda polıtseıler karantınniń engizilýine baılanysty kóptiń kókeıinde júrgen suraqtarǵa onlaında jaýap berdi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylary turǵyndarmen áleýmettik jeli akkaýnttarynda tikeleı efırge shyqty. Maqsat – eldegi tótenshe jaǵdaıǵa baılanysty Petropavlda engizilgen shekteý jáne karantın sharalaryn túsindirý. Jeli qoldanýshylarynyń suraqtaryna Petropavl qalalyq polıtsııa basqarmasynyń bastyǵy Jandos Muqatov pen PD Jergilikti polıtsııa qyzmeti basqarmasy bastyǵynyń orynbasary Aleksandr Rozbah jaýap berdi.
Tikeleı efır bir saǵatqa sozyldy. Osy aralyqta polıtsııaǵa úıden shyǵý jáne qala ishindegi júrý erejelerine qatysty 100-ge jýyq suraq tústi.
Petropavldyqtar bólek turatyn qart ata-analaryna tamaq pen dári-dármek jetkizýde qıyndyq kórýde. Aleksandr Rozbahtyń aıtýynsha, qoldarynda rastaıtyn qujattary, sondaı-aq egde jastaǵy týystarynyń qujattarynyń kóshirmeleri bolǵan jaǵdaıda bul azamattarǵa ákimshilik shara qoldanylmaıdy.
«Óziniń isin júzege asyrý aıasynda, sonymen qatar jumysqa baratyn adamdar úshin júrý baǵytyn rastaıtyn qujattary bolýy kerek. Bul qujattardyń úlgileri Petropavl qalasy ákimdiginiń saıtynda ornalastyrylǵan. Jumysqa óz kóligimen baratyn basqa da júrgizýshilerde jumys ornynan anyqtama bolýy tıis. Aıta ketý kerek, eger anyqtamada kórsetilgen uıym SQO-nyń bas memlekettik sanıtarlyq dárigeriniń buıryǵyna sáıkes tótenshe jaǵdaı kezinde óz qyzmetin júzege asyrýǵa quqyly bolsa, onda onyń anyqtamasynyń kúshi bar bolyp esepteledi», - dedi spıkerler.
Sondaı-aq, polıtseıler barlyq azamattardyń ózderimen birge jeke kýáligin alyp júrý qajettigin eske saldy.
Efır barysynda qoıylǵan suraqtyń kóbi naqty jaǵdaılarǵa baılanysty boldy. Spıkerler aımaqtyń sanıtarlyq dárigeriniń qaýlysyna engizilgen ózgeristerdi eskere otyryp jaýap berdi. Máselen, saıajaılarǵa qatynaýǵa qazirgi ýaqytta tyıym salynǵan.
