Polıtseıler órtengen úıdiń ıesin ajal aýzynan alyp qaldy
KÓKShETAÝ. QazAqparat - Aqmolalyq polıtseıler órtke oranǵan úıdiń ıesin qutqardy, dep habarlaıdy QazAqparat tilshisi ІІD baspasóz qyzmetine silteme jasap.
Polıtseılerdiń məlimetinshe, oqıǵa 12 qazan saǵat 15:40 shamasynda Birjan sal aýdanynyń Zaýralovka aýylynda oryn alǵan.
Osy aýylda qyzmet babymen júrgen polıtsııa kapıtandary Mədı Beısembaev pen Azamat Qazybaev bir úıdiń órtenip jatqanyn baıqap qalǵan.
Tərtip saqshylary birden órt sóndirý brıgadasyn shaqyrtyp, ózderi qyzyl jalynǵa oranǵan úıdegi adamdardy qutqarýǵa umtylady.
Úıdiń esigin buzyp kirgen olar ishte úı ıesin es-tússiz, denesin kúıik shalǵan kúıde tapqan. Polıtseıler birden er adamdy syrtqa shyǵaryp, alǵashqy medıtsınalyq kómek kórsetti. Oǵan qosa, órt jalmaǵan úıdiń ishinen gaz ballonyn da syrtqa alyp shyqqan.
Qazirgi kezde órttiń shyǵýy sebebi anyqtalyp jatyr. Al qutqarylǵan er adam bolsa, Aqmola oblystyq aýrýhanasyna jatqyzyldy. Dərigerler onyń ómirine eshqandaı qaýip tónip turǵan joq deıdi.
Osy oqıǵaǵa baılanysty Aqmola oblysynyń ІІD basshylyǵy Birjan sal aýdanynyń turǵynynyń ómirine arasha túsken polıtsııa kapıtandary Mədı Beısembaev pen Azamat Qazybaevty marapattaý týraly uıǵarymǵa kelip otyr.
