Polıtseıler naýqas balalary bar áriptesterine qarjylaı kómek kórsetti
ASTANA. QazAqparat - Búgin ishki ister organdary qyzmetkerlerin áleýmettik qoldaý qory aýyr naýqas balalar tárbıelenip jatqan úsh polıtsııa qyzmetkeri otbasyna 250 000 teńgeden qarjy aýdardy. Bul jaıynda QR ІІM Memlekettik til jáne aqparat departamentiniń dırektory Almas Sadýbaev óziniń feısbýktegi paraqshasynda jazdy, dep habarlaıdy QazAqparat.
Sonymen qatar onyń atap ótýinshe, qor qaza tapqan polıtseılerdiń otbasyna da ataýly kómek kórsetpek. Táýelsizdik jyldary qyzmettik boryshyn óteý kezinde 938 polıtsııa qyzmetkeri qaza tapqan.
«Polıtseıler esh ýaqytta óz áriptesterin qıyndyqpen jalǵyz qaldyrmaıdy. Qaıǵydan eshkimniń saqtandyrylmaǵany belgili. Sondyqtan qyzmetkerlerge qıyn jaǵdaıda qol ushyn sozý turaqty úrdiske aınalǵan. Osyndaı kómekter úzilmeı jalǵasyn taba berýi úshin Іshki ister mınıstri Qalmuhanbet Qasymov 2016 jyldyń qarasha aıynda ІІM janynan ishki ister organdary qyzmetkerlerin áleýmettik jaǵynan qoldaıtyn Qaıyrymdylyq qorynyń ashylýyna bastamashy boldy. Bul qordaǵy qarjy qalaı jumsalyp jatqany jóninde vedomstvolyq basylymda únemi jarııalanyp, jeke quramnyń nazaryna usynylyp otyrady», - dep jazady Almas Sadýbaev.
