Polıtseıler men órt sóndirýshilerdiń Búkilálemdik oıyndarynda el namysyn 5 sportshy qorǵamaq
ALMATY. 26 shilde. QazAqparat - Soltústik Irlandııanyń Belfast qalasynda 1-10 tamyzda polıtseıler men órt sóndirýshilerdiń XV Búkilálemdik oıyndary ótedi.
70-ten astam elden 10 myńǵa jýyq sportshy qatysatyn bul dúbirli dodada el namysyn júzden júırik shyqqan 5 sańlaq qorǵamaq. Búgin Almaty qalasynyń ishki ister departamentinde olardy shyǵaryp salýǵa arnalǵan saltanatty shara ótti.
«56 sport túrinen ótetin bul jarysqa qatysatyn Qazaqstan quramasynyń kapıtany - benchpress, pýshtýllıftıng, armreslıng sııaqty sport túrlerinen álemniń 9 dúrkin chempıony, polıtsııa podpolkovnıgi, astanalyq Serik Nurǵalıev. Komanda quramynda erkin kúres, dzıýdo jáne grek-rım kúresinen álemniń birneshe dúrkin chempıony, ońtústikqazaqstandyq, polıtsııa podpolkovnıgi Asqar Jandarov, dzıýdo jáne rek-rım kúresinen halyqaralyq dárejedegi sport sheberi, polıtsııa kapıtany, astanalyq Talǵat Qojabaev, sondaı-aq boks, karate sporttarynyń úzdigi, polıtsııa kapıtany, almatylyq Abdýsanat Sharafov pen dzıýdodan sport sheberi, polıtsııa aǵa leıtenanty, shyǵysqazaqstandyq Ashat Elýbaev bar. Jigitter namysty qoldan bermeı, tek júldemen oralady dep senemiz», - deıdi Almaty qalalyq ishki ister departamenti bastyǵynyń orynbasary, polıtsııa polkovnıgi Іzbasar Bekturov. Al qalalyq ishki ister departamenti ardagerleri keńesiniń tóraǵasy, general-maıor Asyl-Kereı Baıbolovtyń aıtýynsha, otandastarymyz tek Álem chempıony bolyp oralýy tıis. Óıtkeni olarǵa tek quqyq qorǵaý organdaryndaǵy áriptesteri ǵana emes, kúlli Qazaqstan tilekshi bolyp otyr. Sondyqtan eldiń abyroıyn asqaqtatý azamattarymyzǵa syn bolmaq.
