Polıtseıler maıdangerdiń nagradalaryn urlaǵan alaıaqty ustady
PETROPAVL. Naýryzdyń 16-sy. QazAqparat /Sergeı Kýznetsov/ - Soltústik Qazaqstan polıtseıleri Uly Otan soǵysy ardageriniń nagradalaryn urlaǵan alaıaq boıjetkendi ustady.
Naýryzdyń 10-y kúni polıtsııage 87 jastaǵy ardager shaǵymdanyp, naýryzdyń 6-sy kúni ózin «Jázıra» dep tanystyrǵan boıjetkenniń qarııanyń barlyq nagradalary taǵylǵan kostıýmin alyp ketkenin habarlady. Ardagerdiń aıtýynsha, boıjetken keýdesi medalǵa toly qarııany dárihanada baıqaǵan. Іrkilmesten ózin stýdentpin dep tanystyryp, Jeńistiń 65 jyldyǵyna oraı dıplom jumysyn jazyp jatqanyn aıtqan. Osylaısha qarttyń senimine kirip, ordenderi men medaldaryn sýretke túsirip alýdy ótingen. Ardager óz marapattaryn kıiminen kesip alýǵa júregi daýalamaı, alaıaqqa pıdjagyn barlyq tósbelgilerimen birge bergen. Boıjetken ózimen birge 1 orden, 17 medal, 5 tósbelgini alyp ketken.
Bul azdaı, boıjetken kelesi kúni kelip qarııadan qaryzǵa 5 myń teńge aqsha alǵan jáne onymen qoımaı, bul somany azsynyp, taǵy suraǵan. Qarııa budan basqa aqshasy joq ekenin aıtyp, aǵynan jarylǵan. Sodan keıin boıjetken tóbesin kórsetpeı ketken.
Nagradalaryn birneshe kún kútken qarııa, bolmaǵan soń boıjetken bergen meken-jaıǵa ony izdep barǵan, biraq onyń onda turmaıtyny anyqtalǵan, sodan keıin qarııa polıtsııaǵa shaǵymdanǵan.
Polıtsııa qyzmetkerleri jedel is-sharalardyń nátıjesinde álgi alaıaq boıjetkendi tapty. Ońaı jolmen tapqan oljasynyń bir bóligin boıjetkenniń lombardqa tapsyrǵany da anyqtaldy. Qalǵan nagradalar da tabyldy.
Qazirgi tańda kúdiktiniń ústinen QR qylmystyq kodeksiniń 177-shi babyna sáıkes (alaıaqtyq) qylmystyq is qozǵaldy, nagradalardy satyp alǵan lombard satýshysyn da jaýapqa tartý máselesi sheshilýde.
