Polıtseıler Qostanaı oblysynda balalardyń urlanǵany týraly habarlamaǵa túsinik berdi
QOSTANAI. QazAqparat - WhatsApp messendjeri arqyly Qostanaı oblysynda balalar urlanǵany týraly daýystyq habarlama taralyp jatyr. Qostanaı oblystyq ІІD ókilderi osyǵan qatysty pikir bildirdi, dep habarlaıdy QazAqparat tilshisi.
Habarlamada áıel adam Qostanaı oblysynyń Begejan eldi mekeninde balalardyń urlanǵanyn aıtady.
«Qostanaı oblysynda balalar urlanyp jatyr, olardy aqshamen aldap-arbap, mashınaǵa otyrǵyzyp áketip jatyr. Aldymen Begejanda osyndaı jaǵdaı boldy. Búgin mektepke bizde de osyndaı oqıǵa bolǵany týraly habar keldi», - delingen aýdıoda.
Oblystyq ishki ister departamenti bul faktini joqqa shyǵardy.
«Faktiler dáleldenbedi. Jábirlenýshilerden ótinish túsken joq. Oblysta mundaı jaǵdaılar tirkelgen joq. Bul jalǵan aqparat», - deıdi ІІD ókilderi.
Sonymen qatar polıtseıler azamattarǵa QR QK 274-babyna sáıkes, kórineý jalǵan aqparat taratý zańǵa qaıshy ekenin eskertip jatyr.
