Polıtseıler kisi óltirýdiń 8 faktisin ashty
NUR-SULTAN. QazAqparat – Ótken aptada elimizdiń aýmaǵynda 3 213 qylmys tirkeldi. Bul týraly QR ІІM baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.
«Bir apta ishinde 3 213 qylmys jasaldy, onyń 2 158-i táýlik ishinde ashyldy. Polıtsııa qyzmetkerleri «izin sýytpaı» 8 kisi óltirýdi, 7 ólimge ákep soqqan densaýlyqqa qasaqana aýyr zııan keltirýdi, 1 qaraqshylyq, 38 tonaý jáne 470 bóten múlikti urlaý qylmystaryn ashty», - dedi ol ІІM baspasóz qyzmeti alańynda ótken brıfıng barysynda.
Sonymen qatar Shuǵyla Turlybek ótken aptada ІІM-de ishki ister organdary jumysynyń qorytyndysy shyǵarylǵan keńeıtilgen alqa otyrysy ótkenin, jıynda eldegi qylmys deńgeıi tómendegeni atalǵanyn aıtty.
«Aýyr qylmystar, densaýlyqqa aýyr zııan keltirý, qaraqshylyq, tonaý, zorlaý, urlyq, mal urlyǵy, buzaqylyq sany azaıǵan. Kámeletke tolmaǵandar tarapynan oryn alǵan qylmystar 40, mas kúıinde jasalǵandary 20 paıyzǵa tómendegen. Qoǵamdyq oryndarda jáne kóshelerdegi quqyq buzýshylyq sany úshten birge qysqarǵan», - dedi baspasóz ókili.
