Polıtseıler qaraǵandylyqtyń poıyzda joǵaltqan 2 mln-ǵa jýyq teńgesin taýyp berdi
NUR-SULTAN. QazAqparat - «Shymkent-Nurly jol» baǵytyndaǵy jolaýshylar poıyzynyń 41 jastaǵy jolaýshysy 1 mln 900 myń teńge qarajaty salynǵan sómkesin joǵaltyp alǵan, dep habarlaıdy QazAqparat Kóliktegi polıtsııa departamentiniń baspasóz qyzmetine silteme jasap.
Osy jyldyń 3 aqpanynda Erbolat Ámirhanov esimdi Qaraǵandy qalasynyń turǵyny Nurly Jol temirjol vokzalyndaǵy Jelilik polıtsııa bólimshesine kelip, iri kólemdegi aqshasy salynǵan sómkesin joǵaltyp alǵandyǵyn, ony izdeýge kómek surap, ótinish bildirdi.
Onyń aıtýynsha, Qaraǵandy stantsııasynda poıyzdan túsken soń, taksı toqtatqan. Kólikte otyrǵan kezde ǵana aqsha salynǵan sómkesiniń joq ekenin baıqaǵan. Vokzalǵa qaıta aınalyp kelgen kezde ózi túsken poıyz bul ýaqytta júrip ketken.
«Budan soń, taksımen poıyzdyń artynan Nur-Sultan qalasyna keldim.
Іle-shala Nurly jol temirjol vokzalyndaǵy jelilik polıtsııa bólimshesiniń polıtseılerinen aqshamdy taýyp berý jóninde kómek suradym», - deıdi Erbolat.
Ótinish túse salysymen temir jol vokzalynyń patrýldik polıtsııa tobynyń polıtsııa serjanty Berik Aqqalıev jedel izdestirý is-sharasyna kirisedi. «Ótinish ıesi joǵalǵan sómkede úlken kólemdegi aqshasynyń bar ekendigin aıtyp, qatty alańdap turǵanyn jetkizdi. Eger sómke jolaýshylar poıyzynda qalǵan bolsa, ony ózimen birge alyp ketetin adamdardyń bolýy da yqımal ǵoı», - deıdi polıtsııa serjanty.
Berik eń aldymen, sómke ıesi otyrǵan vagon jolserigimen, basqa da jolaýshylarmen jedel túrde baılanys jasaıdy. Jedel áreket pen úılesimdi júrgizilgen sharalardyń nátıjesinde 1 900 000 teńge qarajat salynǵan sómke tabylyp, ıesine tabystaldy.
Sómkesi qolyna tıgen E. Ámirhanov kólik polıtseıleriniń qyraǵylyqtary men kásibı sheberlikterine qaıran qalyp, olardyń óz qyzmettik mindetterin adal atqarǵandary úshin júrekjardy alǵysyn bildirdi.
Kólik polıtseıleri bosa, elimizdiń áýe jáne temir jol nysandarynda adamdardyń kóp shoǵyrlanatyndyǵyn taǵy da eske salyp, jolaýshylarǵa baǵaly, qundy zattary men aqsha qarajattaryna barynsha muqııat bolýǵa shaqyrady.
