Polıtseıler iz-túzsiz joǵalǵan 5 qaraǵandylyqty tapty
QARAǴANDY. QazAqparat – 17 mamyrda Qaraǵandy oblysy Polıtsııa departamentiniń aýmaqtyq bólimshelerine jaqyn týystarynyń joǵalyp ketkenin málimdegen 5 azamat júgindi, dep habarlaıdy QazAqparat tilshisi.
Oblystyq PD-nyń aýmaqtyq bólimshelerine bir kúnde óńirdiń bes turǵyny júginip, týystarynyń joǵalǵany týraly habarlaǵan. Bul jaǵdaılar bir-birimen baılanysty emes.
Máselen, Shahtınsk qalasynyń polıtsııa bólimine 27 jastaǵy qala turǵynynan aryz túsken. Ol 24 jastaǵy jubaıynyń joǵalyp ketkenin aıtty. 15 mamyrda ol úıinen ketip, oralmaǵan. Áıelinde eki uıaly telefon bolǵan, biraq barlyq qurylǵylar qandaı da bir sebeptermen balanystan tys bolǵan. Kúıeýi dabyl qaǵyp, aldymen ony óz betinshe tabýǵa tyrysqan. Tipti áleýmettik jelilerde kómek suraǵan. Biraq óz betinshe izdeý jumystary sátsiz bolǵandyqtan, er adam polıtsııaǵa júgingen.
«Joǵalǵan áıeldi birneshe top izdeýge kiristi. Biraz ýaqyttan keıin ol Qaraǵandydan tabyldy. Ótinish berýshiniń áıeliniń aıtýynsha, onyń ýaqytsha ketip qalýyna otbasyndaǵy qarym-qatynas sebep bolǵan», - dep habarlady Qaraǵandy oblysy PD baspasóz qyzmetinen.
Dál osyndaı sebeppen Abaı qalasynyń 31 jastaǵy turǵyny 15 mamyr kúni keshke úıinen ketip qalǵan. Áıel dostaryna qonaqqa kirip, sol jerde qalyp qoıǵan. Onyń joǵalyp ketkeni týraly polıtsııaǵa 61 jastaǵy anasy habarlady. Polıtsııa joǵalǵan adamnyń ornalasqan jerin birneshe saǵattan soń anyqtaǵan.
Bir táýlikten astam ýaqyt boıy Qaraǵandynyń 16 jastaǵy turǵyny da izdestirildi. Ol dosynyń úıine baryp, sol jerde qalyp qoıǵan. Alaıda 56 jastaǵy anasyna ol jaıly eskertpegen. Qyzdy týystary men polıtseıler izdep, taýyp aldy.
16 mamyr kúni keshke 46 jastaǵy qaraǵandylyq serýendeýge shyǵyp, úıine oralmaǵan. Bul týraly onyń 33 jastaǵy áıeli habarlady. Áıel túni boıy jubaıyn kútip, úıine kelmegen soń oǵan izdeý jarııalap, polıtsııaǵa júgingen. Habar-osharsyz ketken er adamdy izdestirýmen Qaraǵandy qalasy PB Ortalyq polıtsııa bóliminiń qyzmetkerleri aınalysty. Er adam tabyldy, ol dostarynda bolǵany anyqtaldy.
Al 17 mamyr kúni saǵat 18.14-te Qaraǵandy qalasy PB Oktıabr polıtsııa bólimine 58 jastaǵy qala turǵyny 12 jastaǵy nemeresiniń saǵat 12.30 shamasynda úıden ketip, qaıtyp kelmegeni týraly habarlaǵan.
Habar-osharsyz joǵalǵan kámeletke tolmaǵan balanyń turǵan jerin anyqtaý maqsatynda polıtsııa bóliminiń jeke quramy men quzyrdaǵy barlyq qyzmetteri baǵdarlandy. Jeti izdeý toby quryldy. Olar dereý qalanyń barlyq aýdandarynda izdeý jumystaryn júrgize bastady. Sondaı-aq, Oktıabr aýdanynyń prokýratýrasynyń eriktileri men qyzmetkerleri quqyqqorǵaý organdaryna kómek kórsete bastady.
«Іzdeý sharalary barysynda tórt saǵattan keıin polıtsııa bóliminiń qyzmetkerleri aýdandyq prokýratýra bóliminiń prokýrorymen birge Qaraǵandy qalasy Ermekov kóshesinde kámeletke tolmaǵan balany tapty. Júrgizilgen profılaktıkalyq áńgimelesýden keıin qyz ata-anasyna qaıtaryldy», - dep habarlady Qaraǵandy oblysy PD baspasóz qyzmetinen.
