Polıtseıler esirtkiniń zańsyz aınalymynda 390 qylmystyń jolyn kesti
ASTANA. QazAqparat - Bir aptanyń ishinde elimizde 1 kelige jýyq geroın, 6,5 keliden astam gashısh tárkilendi. Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
Máselen, 26 qańtarda QR ІІM QR ІІM Esirtki bıznesimen kúres departamentiniń qyzmetkerleri jambyldyq polıtsııa qyzmetkerlerimen birge Qordaı aýylynda Taraz qalasynyń turǵynyn ustady. Onyń jeke zattaryn tintý barysynda 187 gramm geroın tárkilendi.
Al 31 qańtarda Lýgovoe jelilik ishki ister basqarmasy esirtki bıznesimen kúres bóliminiń qyzmetkerleri QR UQK Shekara qyzmetimen birlesip, «Bishkek-Máskeý» baǵytyndaǵy jolaýshylar poıyzyn tekserý barysynda 2 keli geroın áketip bara jatqan Qyrǵyzstan azamatyn ustady.
2 aqpanda Jambyl oblystyq ІІD «Delta-Dolına» esirtki bıznesimen júres jónindegi óńiraralyq bólimniń qyzmetkerleri Merke-Shý-Býrylbaıtal tas jolynda «Folksvagen» markalyq kólikti toqtatqan. Tintý barysynda kóliktegi jolaýshynyń jeke zatynan 6 keli 400 gramm gashısh alyndy. Ustalǵan azamattyń Tasótkel eldi mekenindegi turǵylyqty mekenjaıynyń qorasynan 12,5 keli marıhýana men gashısh daıyndaýǵa arnalǵan elek tabyldy.
Dál osy kúni Taldyqorǵanda da jalpy salmaǵy 1002 gramm geroınmen bir azamat qolǵa tústi.
«Ustalǵandardyń barlyǵy ýaqytsha oqshaýlaǵyshqa qamaldy. Qazirgi ýaqytta olardyń qylmystyq baılanystaryn tekserý júrgizýde. Barlyq fakti boıynsha sotqa deıingi óndiris bastaldy. Atalǵan qylmystardy jasaǵandary úshin 3 jyldan 7 jylǵa deıin bas bostandyqtarynan aıyrylýy múmkin. Jalpy, aǵymdaǵy jyldyń qańtar aıynda polıtsııa qyzmetkerleri esirtiniń zańsyz aınalymynda 390 qylmystyń jolyn kesti, onyń 276-sy satý faktisi», - dedi Almas Sadýbaev.
