Polıtseıler esinen tanǵan júrgizýshi áıeldi qutqardy
QARAǴANDY. QazAqparat - Qaraǵandylyq polıtseıler kólik tizgindep kele jatyp esinen tanyp qalǵan júrgizýshi áıelge kómek kórsetti, dep habaraıdy óńir ákimdiginiń resmı saıtyna silteme jasap.
Oqıǵa 14 aqpanda Qaraǵandynyń qozǵalysy qalyń jol qıylysynda bolǵan. Polıtseıler «Qaraǵandy-Pavlodar» kúre jolyn baqylaýǵa bara jatqan. Ekıpaj quramynda vzvod komandıri, polıtsııa kapıtany Maqsat Serikbekov jáne polıtsııa starshınasy Maqsat Smaıylov bolǵan. Tártip saqshylary Sátbaev kóshesi men Buqar Jyraý dańǵylynyń qıylysynda toqtap qalǵan kólikti baıqaǵan.
Júrgizýshi áıel kólikti basqaryp kele jatyp, esinen tanyp qalǵan eken. Salonda bul mezette eki jolaýshy bolǵan, onyń bireýi kishkentaı bala.
Polıtseıler áıeldi ózderiniń qyzmettik kóligine otyrǵyzyp, jaqyn mańdaǵy aýrýhanaǵa alyp bardy. Sońyra belgili bolǵandaı, ol áıel júkti bolǵan jáne qant dıabetine shaldyqqan. Dárigerler naýqasty jansaqtaý bólimine jatqyzdy.
Osylaısha, polıtseıler júkti áıeldi jáne onyń bolashaq nárestesiniń ómirin ajaldan aman alyp qaldy.
Áıeldiń ata-anasy qyzyn qutqarǵan tártip saqshylaryna alǵystaryn aıtyp, Jergilikti polıtsııa qyzmetiniń basshylyǵyna hat joldaǵan.
