Polıtseıler elorda turǵyndaryna úndeý jasady
NUR-SULTAN. QazAqparat – Elordalyq polıtseıler kóktaıǵaqqa baılanysty júrgizýshiler men jaıaý júrginshilerdi jolda abaı bolýǵa shaqyrdy, dep habarlaıdy QazAqparat tilshisi.
Qalalyq polıtsııa departament taratqan málimetke sáıkes, 20 jeltoqsan kúni elordada 80-ge tarta jol-kólik oqıǵasy tirkelip, bir adam dene jaraqatyn alǵan. Emhanaǵa qaralǵannan keıin ol úıine qaıtaryldy.
«Joldyń retteletin jáne rettelmeıtin bóligin basyp óter kezde jaıaý júrginshilerdi saq bolýǵa shaqyramyz. Júrgizýshiler de jol qıylystary men jaıaý júrginshilerge ótetin joldy basyp óterde saq bolsa deımiz. Jyldamdyq rejımin qatań saqtaý kerek. Ásirese júrgizýshilerdi halyqaralyq saparlardy keıinge shegerip, aýa raıy men joldyń jaı-kúıi týraly habarlamalardy baqylap otyrý kerektigin eskertemiz», - delingen departamenttiń habarlamasynda.
Polıtsııa sonymen qatar qardyń qanshalyqty qalyń jaýatynyn, kóktaıǵaqtyń jaı-kúıinen málimet beretin habarlamalardy nazar tys qaldyrmaý kerektigin eskertedi. Qazirgi ýaqytta qala kóshelerindegi qardy kúreý úshin mamandandyrylǵan tehnıkalar barynsha molynan jumyldyrylǵan.
«Elorda turǵyndaryn osy eskertýge túsinistikpen qaraýdy ótinemiz. Patrýldik polıtsııa qyzmetkerleriniń talaptaryn oryndaý kerek. Jolda kele jatqan qar kúreıtin tehnıkalardyń jumysyna kedergi keltirmeýdi suraımyz», - delingen habarlamada.
