Polıtseıler de Naýryzdy óz deńgeıinde atap ótti
ASTANA. 22 naýryz. QazAqparat /Danıel Shaıynǵazın/ - QR ІІM Kóliktegi ishki ister departamenti jeke quramy da Naýryz meıramyn asa kóterińki, kóńildi jaǵdaıda qarsy aldy.
«Bereke basy - birlikte» - degendeı barlyq basqarmalar men bólimder birlesip, kóktem meıramynyń berekeli de merekeli ótýine bar yntalaryn salyp, ózderiniń teatrlandyrylǵan qoıylymdaryn usyndy.
Merekege ishki ister organdary ardagerlerin, otbasy múshelerin de shaqyrýdy umyt qaldyrǵan joq, dep habarlady baspasóz qyzmetinen Nazym Tasbolat.
Ásirese, «Úılený toıy», «Besikke salý», «Qyrqynan shyǵarý» dep atalǵan qoıylymdardy merekege jınalǵan qaýym qyzyǵa tamashalady.
«Naýryz meıramy jyl sanap elimizde jańasha leppen toılanyp keledi. Bereke men birliktiń, yrys pen molshylyqtyń bastaýy bolyp sanalatyn Naýryz - qasıetti meıram. Bul merekege degen bizdiń yqylas-nıetimiz erekshe. Jer-ana jańaryp, aınalasyna óz shýaǵyn ala kelgen ulystyń uly kúni barshamyzǵa jaqsylyq, eńbegimizge jemis ákelsin. Qol jetkizgen jetistikterimiz jeterlik. Jańa jylda alar asýlarymyz da qomaqty bolady degen senimdemin», - dedi basshylyqtyń atynan jeke quramdy quttyqtaǵan Departament bastyǵynyń orynbasary polıtsııa podpolkovnıgi Tımýr Kárimov.
Merekelik qoıylymdardy qoıýda úzdik shyqqan Shtab, Kadr jumysy basqarmasy, Qoǵamdyq qaýipsizdik, Krımınaldyq polıtsııa, Kóshi-qon polıtsııasy, Tergeý basqarmalarynyń jeke quramy marapattalyp, olarǵa aqshalaı syıaqy tabys etildi.
«Naýryz kójeni toıyp ishý kerek, sonda jyl boıy toqshylyq bolady!» degen senimmen jınalǵan qaýym dastarhanǵa shaqyrylyp, mereke án men bıge ulasty.
