Polıtseıler boranda qalyp qoıǵan qostanaılyqqa kómektesti
QOSTANAI. QazAqparat - Tártip saqshylary Naýyrzym aýdanynda tas joldyń jıegine shyǵyp ketken «Kamaz» kóliginiń 62 jastaǵy júrgizýshisine kómek kórsetti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Oqıǵa Naýyrzym aýdanynda bolǵan. Arqalyq qalasynan Qostanaıǵa kele jatqan «KamAZ» kóligi qarly boranda joldan shyǵyp ketken.
«Shıli jáne Qoja aýyldarynyń arasynda qar qursaýynda qalyp qoıdym. Kólikti óz betimshe tasjolǵa shyǵarǵym kelgen, biraq odan túk shyqpady. Janar-jaǵarmaı taýsyldy, boran odan saıyn kúsheıdi. Kólik ishi qyraýlana bastady», - dep eske alady Bolat Qojybaev.
Munan soń ol polıtsııaǵa qońyraý shalǵan. Oqıǵa ornyna polıtsııa kapıtany Erkin Omarov pen polıtsııa aǵa serjanty Mıras Tólebaev bastaǵan avtopatrýl shyqty.
«Olar júrgizýshige ystyq tamaq jáne jyly kıim berdi, sondaı-aq júk kóligin qaýipsiz jerge kóshirýge arnalǵan aýyr tehnıkany uıymdastyrdy. Arnaıy tehnıkanyń kómegimen «KamAZ» kóligi qar qursaýynan shyǵyp, jaqyn mańdaǵy aýylǵa jetkizildi», - delingen PD baspasóz habarlamasynda.
Bolat Qojybaev Qostanaı oblysy polıtsııa departamentiniń bastyǵy Beket Aımaǵambetovtiń atyna hat jazyp, qatty aıaz kezinde kómekke kelgen polıtseılerge alǵysyn bildirdi.
