Polıtseıler armenııalyq kólikterdi zańdy tirkeý tártibin túsindirdi
TALDYQORǴAN. QazAqparat - Almaty oblysynyń polıtseıleri Armenııalyq kólikterdi zań talabyna sáıkes tirkeýge qoıýdyń tártibin túsindirdi, - dep habarlaıdy QazAqparat tilshisi.
«Memleket basshysynyń tapsyrmasyna sáıkes, Armenııa Respýblıkasynan elimizge ákelingen kólikterdi ýaqytsha tirkeýge qoıý máselesi birizdendirilgen bolatyn. Biregeı aktsııanyń aıaqtalý merzimi 2021 jyldyń naýryz aıyna deıin uzartylǵanyn da avtoáýesqoılar jaqsy biledi.
Elimizdegi qoldanystaǵy zańnamaǵa sáıkes basqarý tetigi, ıaǵnı róli oń jaqta ornalasqan avtokólikter tirkeýge qoıylmaıtyny anyq. Osyǵan oraı, Armenııadan ákelingen osyndaı kólik ıelerine temir tulparlaryn tehnıkalyq talaptarǵa saı qylýǵa múmkindik berildi. Barlyq qajetti protsedýralardan keıin olar kólikterin Almaty qalasy, Raıymbek dańǵyly, 312 mekenjaıynda ornalasqan «Almaty-Standart» ǵylymı-zertteý ortalyǵy» JShS bazasynda synaqtan ótkizip, qaýipsizdik kýáligin alýy tıis»,- dedi Almaty oblysy Polıtsııa departaminti Ákimshilik polıtsııa basqarmasynyń bastyǵynyń mindetin atqarýshy polıtsııa polkovnıgi Serikjan Ábjanov.
Polıtsııa ókiliniń aıtýynsha, osyndaı kýáligi bar kólik esh qıyndyqsyz tirkeýge qoıylady. Al, kóliktiń qaýipsizdigin tekserip, kýálik tabystaıtyn mekemeler elimizdiń soltústiginde Qostanaı jáne Petropavl qalalary men batysyndaǵy Oral qalasynda da bar.
«Osy talapty oryndaǵan 29 kólikti tirkeýge qoıdyq. Utymdy sátti paıdalanyp, armenııalyq tirkeýdegi kóligi bar turǵyndardy osy múmkindikti paıdalanyp, kólikterin zańdastyryp alýǵa shaqyramyn»,- dedi polıtsııa polkovnıgi Serikjan Ábjanov.
