Polıtseıler aptap ystyqta jol júretin júrgizýshilerge keńes berdi
TALDYQORǴAN. QazAqparat – Almaty oblysynyń polıtseıleri aımaqta ystyq aýa raıynyń saqtalýyna baılanysty júrgizýshilerge saqtyq sharalaryn saqtaý týraly ótinish bildirdi, dep habarlaıdy QazAqparat tilshisi.
«Alys saparǵa jol júrýdi tańerteń nemese keshke, ıaǵnı kún joq kezde josparlaý qajet. Dári-dármekti júksalǵyshta emes, ózimen birge qobdıshasynda ustaǵan jón jáne tátti sýsyn emes, taza sý ishýge keńes beremiz. Sebebi tátti sýsyn adamdy shóldete beredi. Sondaı-aq kúnniń ystyǵynan asfalt óz sapasyn joǵaltady jáne taıǵaq bolady. Sondyqtan jolda barynsha abaı bolý kerek. Kóliktiń sýytý júıesin únemi baqylap, termometrdiń »qyzyl« aımaqqa shyǵýyna jol bermeý kerek. Dızeldi otyn men benzın joǵary temperatýra kezinde býlanady. Bul órttiń shyǵýyna ákelýi múmkin. Osyǵan baılanysty, barlyǵyn aldyn-ala tekserip otyrý qajet. Kúnniń aptap ystyǵynda júrek-qantamyr jáne sozylmaly aýrýlary bar júrgizýshilerge osy kezeńde jol júrýden bas tartýǵa keńes beremiz. Kólikti júrgizip kele jatyp ózin jaısyz sezinetin bolsa, júrgizýshi kólikti toqtatýy kerek. Jaǵdaıy nasharlaǵan jaǵdaıda tez arada 112 nemese 102 qutqarý qyzmetine qońyraý shalǵany jón. Sondaı-aq ystyq aýa raıynda kóptegen adamdarda bastyń aınalýy, álsizdik, uıqyshyldyq paıda bolyp, uıyqtaý qaýpi artatynyn eske salamyz» delingen Almaty oblystyq Polıtsııa departamentiniń baspasóz qyzmeti taratqan habarlamada.
Esterińizge sala keteıik, oblystyq TJD-i óńirdiń turǵyndaryna 19-22 shilde aralyǵynda aýa temperatýrasynyń 43 gradýsqa deıin kóteriletinin eskertip, sms habarlama taratqan bolatyn.
