Polıtseıler Almatydaǵy adam ólimi isin ashty
ALMATY. Qańtardyń 23-i. QazAqparat /Ádilet Musahaev/ - Polıtseıler 25 jasar jigittiń ólimine baılanysty qylmystyq isti aıǵaqtady,
dep habarlaıdy QazAqparat, ІІD baspasóz qyzmetine silteme jasap.
Aǵymdaǵy jylǵy qańtardyń 20-synda 205-shi yqshamaýdanda ornalasqan «Megabıt» kompıýterlik ortalyǵynan túnde «Toıota Korolla» kóligimen shyǵyp ketken jas jigit iz-túzsiz joǵalyp ketken.
Bir táýlik ótkennen keıin «Almaty - Bishkek» avtojolynyń 52-shi shaqyrymynda Almaty oblysynyń Jambyl aýdanyna qarasty Jańaturmys aýylynyń shetinen jergilikti turǵyndar jas jigittiń máıitin kórgen. Polıtseıler marqumnyń kim ekenin aıqyndaý barysynda iz-túzsiz joǵalǵan jigit ekenin anyqtaǵan. Krımınalıster ol bas súıek mı jaraqatynan ólgen degen sheshimge kelgen.
Sol kúni Jambyl oblysynyń ІІB-nyń saqshy qyzmetkerleri Baızaqov aýdanyndaǵy Korolevka aýylynan marqumnyń avtokóligin tapqan. «Toıoto» avtokóligin Ońtústik Qazaqstan oblysynyń 20 jasar turǵyny ıemdengen. Jas jigit alaıaqtyq ispen aınalysqany úshin burynda zań boıynsha jazalanǵan bolyp shyqty. Polıtseıler sonymen qatar Ońtústik Qazaqstan oblysynyń 17 jasar jolaýshysyn ustaǵan.
Quryqtalǵandar qańtardyń 20-synda Almatydaǵy «Megabıt» klýbynyń janynda avtokólikti ıemdený maqsatynda jas jigitti óltirgendigin moıyndaǵan. Odan keıin qaskúnemder máıitti avtojoldyń 52 shaqyrymyndaǵy aýyldyń shetine tastap ketken.
Qazirgi ýaqytta ustalǵandar Almatyǵa jetkizildi, olarǵa QR QK 96-baby boıynsha adam óltirdi degen aıyp taǵylyp, tergeý júrgizilýde.
