Polıtseıler Almatyda turatyn kásipker ápkesin qaryz bermegeni úshin pyshaqtap, tonap ketken jas jigitti ustady
ALMATY. 29 aqpan. QazAqparat -Polıtsııa qyzmetkerleri Almatyda aýyr qylmys jasap, Astanada boı tasalap júrgen jas jigitti qolǵa túsirdi.
Almatyǵa ótken jyldyń qarasha aıynda kelgen jıen jigit kásipker ápkesin «Aqsaı» yqshamaýdanynda ornalasqan páterinde 11 jerinen pyshaqtap, tonap ketken. Almaty qalasy ІІD Krımınaldyq polıtsııa basqarmasynyń bólim bastyǵy Sabyrjan Jurabekovtyń aıtýynsha, jábirlenýshi áıel asa aýyr halde aýrýhanaǵa jetkizilgen. Der kezinde medıtsınalyq kómek kórsetken dárigerler onyń ómirin saqtap qaldy. Qazirgi kezde densaýlyǵy qalypqa túse bastady. Tilge kelgen jábirlenýshiden qandyqol qaraqshynyń onyń jıeni ekeni anyqtalyp, kúdiktini Astana qalasynda ata-anasymen birge turyp jatqan óz úıinde qolǵa túsirdi. Buryn da ózgeniń múlkin urlaǵany úshin qylmystyq jaýapkershilikke tartylǵan bul azamat tergeý kezinde óz áreketin qaryz aqsha bermegen ápkesin qorqytý maqsatynda jasaǵanyn aıtqan.
