Polıtseıler Almaty oblysynyń joldarynda kezekshilikti kúsheıtti
TALDYQORǴAN. QazAqparat - Almaty oblysynyń tártip saqshylary «Qaýipsiz jol» jedel aldyn alý is-sharasyn uıymdastyryp, barlyq avtojoldarda patrýldeý jumystaryn kúsheıtti, dep habarlaıdy QazAqparat tilshisi.
«Sharanyń negizgi maqsaty - oblys joldarynda kólik apattaryna sebepshi bolyp jatatyn qaýip-qaterlerdiń alý. Barlyq kólik ıelerin qozǵalys qaýipsizdiginiń talaptaryn qatań saqtaýǵa shaqyrý jáne jol erejesin buzýdyń sońy qaıǵyly jaǵdaılarǵa ákep soǵatynyn eske salý. Atalǵan is-shara barysynda óńirde ártúrli aktsııalar uıymdastyrylýda. Mysaly, «Jyldamdyq marafony», «Joldaǵy qabyldaý», «Mas júrgizýshi» jáne t.b. syndy sharalar jol-kólik jaraqattarynyń aldyn alýǵa baǵyttalǵan»,- dep málimdedi Almaty oblysy Polıtsııa departamentiniń baspasóz qyzmeti.
Jyl basynan beri oblystaǵy joldarda 100 adam qaıtys bolyp, 700-den astam adam ártúrli dene jaraqattaryn alǵan. Oblystaǵy barlyq jol-kólik oqıǵalardyń 73 paıyzy jergilikti mańyzy bar joldar men kóshelerde oryn alsa, qalǵan 27 paıyzy respýblıkalyq joldarda tirkelgen.
«Biz júrgizgen taldaýǵa sáıkes, eń negizgi tártip buzýshylyqtar - jyldamdyq rejımin saqtamaý, joldyń qarsy baǵytyna shyǵý jáne jol júrý erejelerin jaıaý júrginshilerdiń óreskel buzýy. Biz, óz kezegimizde, qoǵam nazaryn osy problemaǵa aýdarýdy qajet dep sanaımyz. Óz qaýipsizdiginiń qarapaıym talaptaryn elemegendikten beıbit kúni adamdar qaıtys bolyp jatyr»,- dep atap ótti polıtsııa ókilderi.
Aıta keteıik, aldyn alý is-sharasy óńirde 15 sáýirge deıin jalǵasady. Polıtseıler uıymdastyrylatyn túrli is-sharalarǵa baılanysty olardyń áreketterine túsinistikpen qaraýdy jáne múmkindiginshe qoldaý kórsetýdi suraıdy.
«Sońǵy bir kún ishinde temir tulpardy mas kúıinde tizgindegen 13 júrgizýshi ustaldy. Ár derek boıynsha olardy qatań jaýapqa tartý týraly ákimshilik hattama toltyryldy. Jol júrý erejesin eskermeı, óreskel buzǵan jaıaý júrginshiler de jaýapqa tartylady. Keshe 30 jaıaý júrginshige hattama toltyrylǵan»,- dep tolyqtyrdy oblystyq polıtsııanyń baspasóz qyzmeti.
