«Polıtseıler adamdy aıaýsyz sabaǵan»: Departament oqıǵanyń qalaı bolǵanyn málim etti

SEMEI. QazAqparat – Abaı oblysynyń Polıtsııa departamenti áleýmettik jelide «Semeı qalasynyń polıtsııa qyzmetkerleri Astana qalasynyń turǵynyn aıaýsyz sabaǵany» týraly aqparatqa qatysty resmı málimdeme jasady, dep habarlaıdy QazAqparat tilshisi.

Oblystyq Polıtsııa departamentiniń málimetinshe, tártip saqshylary 46 jastaǵy er adamdy qoǵamdyq orynda mas kúıde júrgenin kórgen. Sol úshin oǵan ákimshilik hattama toltyrǵan.

«Bul másele boıynsha tekserý júrgizildi. Polıtseılerdiń baqylaý kameralary men beınejetondarynyń jazbalary zertteldi. Jazbalarda polıtseılerdiń er adamdy medıtsınalyq aıyqtyrǵyshqa aparyp, medıtsına qyzmetkeri jetkizilgen adamdy tekserip, «ortasha dárejeli» mas kúıde bolǵandyǵy týraly kýálandyrý júrgizgeni kórinip tur. Aıyqtyrǵyshta ol polıtseıler tarapynan alǵan dene jaraqaty týraly esh habarlaǵan joq», - delingen aqparatta.

Keıin oǵan ákimshilik hattama toltyrylǵan. Azamat hattamamen tanysyp, kelisip, polıtseıdiń planshetine óz qolymen qol qoıǵan.
«Biraq keıin Instagam-daǵy blogynda ózin soqqy alǵan adam retinde kórsetip, ortalyq polıtsııa bólimine baryp, basqa polıtseılerden oǵan jedel járdem shaqyrýyn ótingen. Qazir QR QK 419-babymen (Kórineý jalǵan sóz jetkizý) boıynsha qylmystyq is qozǵaý máselesi qaralýda», - delingen habarlamada.