Polıtseıge qol jumsaǵan astanalyq turǵynnyń bostandyǵy shekteldi
ASTANA. QazAqparat - Elordada ishimdikke sylqııa toıǵan er adam jedel járdem men polıtsııa shaqyryp, sońynda tártip saqshysyna qol jumsaǵan, dep habarlaıdy QazAqparat.
Astana qalalyq soty baspasóz qyzmetiniń málimetinshe, 2017 jyldyń 2 jeltoqsanynda elordalyq turǵyn óz úıinde araq ishkennen keıin, ózin jaısyz sezinip, jedel járdem shaqyrǵan.
«Jedel járdem dárigerleri kelgennen keıin, ol ózin dóreki ustap, medıtsınalyq mekemege barýdan bas tartqan jáne 102 nómirine qońyraý shalyp, polıtsııa qyzmetkerin shaqyrǵan», - delingen taratylǵan aqparatta.
Shaqyrtý boıynsha oqıǵa ornyna jetken sholǵynshy polıtsııa qyzmeti mán-jaıdy anyqtaý úshin atalǵan azamattan jeke kýáligin suraǵan. Al ol bılik ókiliniń zańdy talabyn oryndamaı, tipti kópshilik aldynda til tıgizgen.
«Osydan keıin ol polıtsııa qyzmetkeriniń beıne tirkeýishin julyp alyp, edenge tastaǵan jáne qarsylyq kórsetip, quqyq qorǵaýshylardyń biriniń betinen birneshe ret urǵan», - dep naqtylady Astana qalalyq sotynan.
Sonymen Astana qalasy Almaty aýdandyq № 2 sotynyń úkimimen elordalyq turǵyn kináli dep tanylyp, oǵan 1 jylǵa bas bostandyǵynan shekteý jazasy belgilendi.
